Талдықорғандағы Салтанат сарайында Спорт күні мерекесіне арналған салтанатты жиын өтті. Шараға облыстық мәслихаттың төрағасы Гүлнар Тойлыбаева мен облыстағы дене шынықтыру және спорт басқармасының басшысы Ұлан Рысқұл қатысып, спортшыларға тілегін айтып, арнайы сый-сияпат беріп, марапаттады.
Жыл сайын спорттағы жетістіктерді саралап отыруды облыстағы дене шынықтыру және спорт басқармасы дағдыға айналдырған. Жылдағысынан дамып, өркендеу көрсеткіші ұлғайып келе жатқан өңірдің өз мақтаныштары бар. Олар ел арасындағы сында ғана емес, Қазақстанның абыройын әлемдік аренада қорғап жүр. Соның бірі – кеше ғана жастар арасында әлем чемпионы болып, ел мерейін өсіріп жатқан Исхар Құрбаев, велоспорттан әлемдік сында алдына жан салмай бірінші келген Евгений Федоров сынды спортшыларымыз – біздің мақтанышымыз!
Жиынның басы жеңіске жеткен жетісулықтар жөніндегі бейнекөрсетіліммен басталды. Одан кейін Ұлан Рысқұл сөз алып, облыстағы орын алып жатқан спорттағы өзгеріс пен жетістіктерді бір сүзіп өтті.
– Облысымызда 5 дене шынықтыру-сауықтыру кешені жұмыс істеп тұр. Жақында Кербұлақ ауданындағы Басши ауылында күрес залы, Алакөл ауданы Бескөл ауылында 80 орынды спорттық кешен қолданысқа берілді. Жыл басынан бері 15 халықаралық дәрежедегі спорт шебері, 85 спорт шебері, 586 спорт шеберіне кандидат және 202 бірінші разрядты спортшы дайындалады. Келер жылы Париж қаласында өтетін ХХХІІІ жазғы Олимпиада ойындарына облыс спортшылары лицензия алып, әлемнің назарында болып, Көк туды желбіретіп, Әнұранды әуелетіп қайтсын , – деп тілек білдірді басқарма басшысы. Артынша Ұлан Ғалымұлы спортқа еңбегі сіңген 43 адамды Спорт күніне орай медаль және Алғыс хатпен марапаттады.
Облыстық мәслихаттың төрағасы да бірқатар қызметкер мен спортшыларға төсбелгі тағып, үздіктердің абыройын өсіріп тастады. Спортшылар бүгінде кең қолдауға ие, тек жақсы нәтиже көрсетіп, ел абыройын асқақтату үшін де мүмкіндік көп. Бұл Гүлнар Тойлыбаевның баяндамасынан.
Қуанышқа келгендер арасында Талдықорған қаласының А. Кивилев атындағы облыстық велоспорттан олимпиадалық резерві мамандандырылған балалар мен жасөспірімдер мектебінің директоры Самат Сапажанов та бар. Ол ҚР Мәдениет және спорт министрлігінің «Дене шынықтыру және спортты дамытуға сіңірген еңбегі үшін» төсбелгісімен марапатталды. Оның айтуынша, қарыштап дамыған заманда спорт та соған сай өркендеп, қанат жаюы қажет. Мүмкіндік мол заманда әр спортшы өз білгенінен жаңылмау керек.
