Дзюдодан Париж Олимпиядасында өнер көрсеткен Қазақстан ұлттық құрамасы 1 алтын және 1 қола медаль иеленді.
Бүгін «Динамо» спорт қоғамының мүшесі, әрі Ұлттық ұланның әскери қызметшісі капитан Елдос Сметов бастаған дзюдошылар елге оралды.
Алматы халықаралық әуежайынан оларды «Динамо» спорт қоғамы, Ұлттық ұланның «Оңтүстік» өңірлік қолбасшылығының әскери қызметшілері және спорт сүйер қауым қарсы алды. Олимпиада жүлдегерлерін күтіп алғандар арасында спортшылардың ата-анасы, туған туыстары және бұқаралық ақпарат құралдарының өкілдері де болды. Әуежайға әскери оркестр арнайы барды. Олжамен оралған оғландарға бауырсақ ұсынып, шашу шашылды. Құшақ-құшақ гүл шоқтары тарту етілді.
«Динамо» спорт қоғамының спортшысы, Қазақстан Республикасы Ұлттық ұланының спорт командасын даярлау орталығының әскери қызметшісі капитан Елдос Сметов 60 келі салмақ дәрежесінде Олимпиада чемпионы атанып, боз кілемде қазақ елінің абыройын асқақтатқан еді. Балуанға халық дән риза.
— Ыстық ықылас, үлкен қошеметпен қарсы алып жатқан еліме алғыс айтамын! Өте керемет сезімде тұрмын. Сөзбен айтып жеткізу мүмкін емес. Қазақ еліне осындай сәтті сыйлай алғаныма қуаныштымын. Боз кілемдегі қарсыластар осал болмады. Шешуші кезеңде намысқа тырысып барымды салдым. Маған қолдау білдіріп, жанкүйер болған барша отандастарыма алғысым шексіз, – дейді Елдос Сметов.
Чемпионның әкесі Бақтыбай Сметовтың да қуанышында шек жоқ. Ол ұлының еткен еңбегі мен төккен тері ақталғанын айтты.
— Құрметті қазақ елі! Бүгін, мінекей үлкен қуанышта Елдос баламызды күтіп алдық. Оны күтіп алуға Ұлттық ұланның әскери қызметшілері де атсалысып жатыр. Қолдауларына ризашылық білдіремін, қызметтеріне жеміс тілеймін! Осындай ұрпақтарды тәрбиелеп, өсіре берсін, — дейді Бақтыбай Сметов.
Еске салайық, Елдос Сметов бірінші кездесуде Нидерланды өкілі Торнике Цжакадоевті жеңсе, одан кейін өзбек дзюдошысы Дилшот Халматовты тізе бүктірді. Содан соң Қытай Тайбейінен келген Юн-Вэй Яңды «вазари» әдісімен жеңіп шықты. Ал жартылай финалда испандық Франсиско Гарригостен басым түсті. Финалда Франция өкілі Лука Мхеидзеніқапы қалдырған Ұлттық ұлан әскери қызметшісі Париж Олимпиадасында ел қоржынына бірінші алтынды салып берді.
ҚР ІІМ Ұлттық ұланы «Оңтүстік» өңірлік
қолбасшылығының баспасөз қызметі
