Қазақстанда 2025 жылдың қазан айында тұрғын үйді сатып алу-сату бойынша 41 259 мәміле жасалды. Оның ішінде 8 717-сі жеке үйлерге, ал 32 542-сі көппәтерлі тұрғын үйдегі пәтерлерге тиесілі. Бұл деректерді Ұлттық статистика бюросы жариялады.
Қыркүйек айындағы көрсеткішпен (41 313 мәміле) салыстырғанда, жалпы мәмілелер саны 0,1%-ға төмендеген.
Негізгі үлес дәстүрлі түрде елдің ірі қалаларына тиесілі. Астана қаласында – 8 945 мәміле (21,7%), Алматыда – 7 868 (19,1%), Қарағанды облысында – 2 982 (7,2%) мәміле тіркелген. Ең аз белсенділік Ұлытау облысында байқалды – барлығы 327 мәміле (0,8%).
Өткен жылдың қазан айымен салыстырғанда жалпы мәмілелер саны 5,4%-ға артқан. Ең жоғары өсім Астана қаласында (+27,9%), Қостанай облысында (+15,8%), Шымкентте (+7,7%) және Алматы облысында (+7,4%) тіркелген. Ал Қызылорда облысында – 28,4%, Алматы қаласында – 11,2%, Ақтөбе облысында – 5,2% төмендеу байқалған.
Қазан айында көппәтерлі үйлерге қатысты мәмілелердің үлесі 78,9% болды (32 542 мәміле). Бұл қыркүйекпен салыстырғанда 0,3%-ға аз.
2025 жылдың қаңтар-қазан айларында тұрғын үй нарығындағы мәмілелер саны өткен жылдың осы кезеңімен салыстырғанда 3,5%-ға өсті. Сарапшылардың айтуынша, нарықтағы белсенділіктің артуына ипотекалық бағдарламалар, халықтың көші-қоны және инвестициялық сұраныстың өсуі әсер етіп отыр.
Дереккөз: El.kz
