Еңбегімен ел дамуына үлес қосып жүрген азаматтарға облыс әкімі Бейбіт ИСАБАЕВ ерекше құрмет көрсетті. Өз ісіне адалдық пен кәсіби шеберлік танытқан еңбек адамдары мемлекеттік наградаларға ие болды. Олар үшін бұл – еңбектің еленуі ғана емес, жұмыстарына тың серпін беретін қуанышты сәт.
– Жерлестеріміздің адал еңбегі, табандылығы мен жауапкершілігінің нәтижесінде ел экономикасы дамып, әлеуметтік сала жетілдірілуде. Жалпы, биыл облысымыз жылды жақсы нәтижемен аяқтап отыр. Негізгі көрсеткіштер бойынша үздіктер қатарынан көріндік. Осы жетістіктерімізде түрлі салада еңбек етіп жүрген жұмысшы мамандардың еңбегі зор. Соның ішінде бүгін арнайы келіп отырған коммуналдық салада, өнеркәсіпте, энергетика секторында жемісті еңбек етіп келе жатқан өздеріңіздің де үлестеріңіз бар. Халықтың өмір сүру сапасын жақсарту – Мемлекет басшысы алдымызға қойған негізгі міндеттің бірі. Осы орайда сіздер тұрғындарды сапалы ауызсумен, электр жарығымен қамтамасыз етуге, отандық өнім шығару ісіне күнделікті жұмыстарыңызбен белсене атсалысып, кәсібилік танытып келесіздер, – деді аймақ басшысы.
Облыс әкімі Президент Қасым-Жомарт Тоқаев қоғамда еңбек культін орнықтыру, жұмысшы мамандықтарының мәртебесін арттыру саясаты облыста жүйелі жүргізіліп отырғанын атап, мемлекеттік наградаларды табыстады.
ҚР Президентінің Жарлығымен елдің әлеуметтік-экономикалық және өнеркәсіптік дамуына қосқан елеулі үлесі үшін «Құрмет» орденімен «Көксу жылу-су сервис» кәсіпорнының слесарі Серік Шыныбеков марапатталды. «Ақсу қант» ЖШС жөндеу-дәнекерлеу шеберханасының шебері Тоғанжан Берқұманов пен «Қаратал таза су» кәсіпорнының шебері Руслан Байгенжінов ІІІ дәрежелі «Еңбек Даңқы» орденін иеленді. «Басқан Пауэер» ЖШС-нің слесарь-механигі Сейітқазы Төлепбергенов «Ерен еңбегі үшін» медалін кеудесіне тақты. Елорда төрінде өткен «Жұмысшы мамандықтары жылын» қорытындылау форумында «Темірбетон» ЖШС-нің қалыптаушысы Мұрат Нүкебаев «Ерен еңбегі үшін» медалін иеленді.
Жалпы, осы жылы Президент Жарлығымен 1300-ге жуық жұмысшы мамандықтар өкілі мемлекеттік марапатқа ие болды. Осының барлығы еселі еңбекті қадірлеуге бағытталған жемісті жұмыстың нәтижесі. «Жұмысшы мамандықтары жылы» біздің қоғам еңбекті ерекше қадірлейтінін көрсетті. Халық арасында елге нақты пайда әкелетін адамдар құрметті, сыйлы екенін байқатты. Кәсіби мамандарды дәріптеу алдағы уақытта да үздіксіз жалғаса бермек.
Еңлік КЕНЕБАЙ
