Бүгінгі таңда елімізде ерекше білім беруді қажет ететін оқушылар саны жыл сайын артуда. Олардың білім алып, әлеуметтік ортаға бейімделіп, қоғамда толыққанды өмір сүруі үшін мүмкіндіктер қарастырылған.
Ерекше білім беруді қажет ететін оқушылардың басым бөлігі арнайы білім беретін ұйымдарда оқиды. Онда оқушылардың әртүрлі физиологиялық және психологиялық бұзылыстарын түзете отырып, арнайы бағдарламалар бойынша білім беріледі. Облысымыз бойынша ерекше білім беруді қажет ететін оқушылар үшін жеті мектеп-интернат жұмыс жасайды.
Ата-аналар арнайы мектепке балаларын орналастыру үшін алдымен психологиялық-медициналық-педагогикалық консультация (ПМПК) қызметке жүгінеді. ПМПК-ның негізгі қызметі – бұл білім беру қажеттіліктерін бағалау және балаларға арналған оқыту бағдарламасының түрін анықтау, ата- аналарға кеңес беру. ПМПК нақты тұжырым жасап, оқу бағдарламасын анықтаған соң баланы арнайы бағдарламамен білім алу керек деп тапса, онда ата-ананың келісімімен арнайы мектепке жібереді. Арнайы білім беру мекемелеріне оқушылар ҚР Білім және ғылым министрінің 2020 жылғы 27 мамырдағы №223 бұйрығының 4-қосымшасына сәйкес «Арнайы жалпы білім беретін оқу бағдарламалары бойынша оқыту үшін мүмкіндіктері шектеулі балалардың құжаттарын қабылдау және арнайы білім беру ұйымдарына қабылдау» мемлекеттік көрсетілетін қызмет қағидасына сәйкес қабылданады. Ерекше білім беруді қажет ететін балаларды арнайы білім беру ұйымдарына қабылдау арнайы мектепте қағаз түрінде немесе арнайы білім беру ұйымдары «Электрондық үкіметтің» веб-порталы: www.egov.kz арқылы жүзеге асырылады.
Арнайы білім ұйымына 30 тамызға дейін, ал бірінші сыныпқа 1 шілде мен 30 тамыз аралығында құжаттар қабылданады. Бұл ретте қызмет алушы жүгінген кезде міндетті түрде ата-ананың немесе заңды өкілінің арнайы білім беру ұйымына қабылдау туралы өтініші, психологиялық-медициналық-педагогикалық консультация қорытындысы болуы керек.
Қызмет көрсетілген кезде ақпараттық жүйелерден алуға болатын құжаттарды талап етуге жол берілмейді. Құжаттар қабылданған жағдайда қызмет алушыға ол туралы еркін түрде қолхат беріледі. Егер де қызмет алушы талап етілген құжаттарды толық өткізбесе немесе құжаттардың қолдану мерзімі өтіп кетсе қызмет көрсетуші өтінішті қабылдаудан бас тартады және мемлекеттік көрсетілетін қызмет қағидаларына сәйкес құжаттарды қабылдаудан бас тарту туралы хабарлама береді.
Оқушылар мектепке қабылданғаннан бастап ПМПК бекіткен арнайы бағдарламамен білім алып, арнайы мамандардың (дефектолог, психолог, тифлопедагог, сурдопедагог, логопед, ЛФК) көмегін алады.
Досжан САЛТАКОВ,
Қаскелең қалалық облыстық зерде бұзылыстары бар балаларға арналған арнайы мектеп-интернатының дефектолог маманы
