«Жұмысы жоқ адам азғындыққа бір табан жақын болады» дейді Дейл Корнеги. Бұрынғының сөзі кейде өмірдің шынайы келбетіне сай келмейді. Жұмысы жүрсе де, табысы болса да азғындықтың ауылына атбасын бұрғандар азаймай тұр.
Бұлай деуімізге себеп, былтыр жыл көлемінде облыстың тәртіп сақшылары 736 келі есірткі тәркілеген. Нәтижесінде өңірде 186 есірткіге байланысты құқық- бұзушылық анықталған. Жыл өткен сайын тәртіп сақшылары құрықтаған есірткінің көлемі өсіп отыр. Мәселен, 2022 жылы 141,7 келі, 2023 жылы 301,9 келі, 2024 жылы 302 келі есірткі заңсыз айналымнан шығарылды. Былтыр да бұл бизнестің көркін қыздырғандар қарап қалған жоқ. Биылғысын көрерміз.
Сонымен, заңсыз айналымнан шыққан есірткінің басым көпшілігі 254 келіден астамы марихуана, 17 келісі гашиш, 15 келіден астамы синтетикалық есірткі. Қалған 448 келі есірткі қарасора тектес өсімдіктер сапынан. Өңірде жүргізілген ауқымды жұмыстардың нәтижесінде 17-30 жас аралығындағы 135 азамат ұсталған. Бір өкініштісі бұл қылмыс түрімен кәмелет жасқа толмағандар да айналысқан. 17 жастағы 3 жасөспірім де құрықталып отыр. Олардың екеуі сот үкімімен 5 жылға бас бостандығынан айырылды. Жалпы, құқық қорғаушылар есірткі заттарын сату бойынша 54 дерек, аса ірі мөлшерде сақтау бойынша 15 дерек, трансұлттық ұйымдасқан қылмыстық топ құру және оған қатысу бойынша 2 дерек, есірткіні заңсыз насихаттау және жарнамалау бойынша 11 дерек тіркелді. Сонымен қатар құрамында есірткі бар өсімдіктерді заңсыз өсірген 12 дерек анықталған. Осындай ірі көлемде есірткі бизнесінің көркін кіргізгендердің үстінен 140 қылмыстық іс сотқа жолданып, 127 адам темір торға тоғытылды.
Есірткі таратуда әлеуметтік желі таптырмас құралға айналған. Құқық қорғаушылар желідегі белсенділікті күшейтуіне себеп осы жай. Өңірдің тәртіп сақшылары есірткіні таратқан және жарнамалаған 3194 Telegram-сайт бұғаттаған. Киберқылмыспен күресушілер «Антифрод» бағдарламасы арқылы 23 млн. теңгесі бар 788 банк шотын бұғаттап, «Аргус» бағдарламасы көмегімен 9775 шетелдік есепшот анықтаған.
