Текелі қаласының тұрғыны Жанна Жаңабаева экологиялық таза өнім «Гидролат» өндіреді.
Гидролат – гүлді су ерітіндісінен жасалады және ол тері мен шаш күйін жақсартуға ықпалын тигізеді. Іскер әйел бұл ойын қалай жүзеге асырғаны туралы айтайық. Жанна Жаңабаева 2 жыл бойы гидролатты үйде өндірді. Алғашқы кезде кәсіпкердің бұл өндіріске құштарлығы оянып, оны жақын адамдары да бағалады. Кейіннен ол гидролатқа сұраныстың артқанын байқап, өз ісін бастауға шешім қабылдады.
Содан кейін ол кәсіпкерлер палатасынан қолдау алып, өткен жылы «Бір ауыл – бір өнім» жобасына қатысуға мүмкіндік алды. Сөйтіп, гидролат өндірушісі үздік ондыққа енді. Жобаға қатысқан іскер әйел кәсібін одан әрі дамытудың болашағы зор екенін түсінді. Жанна Жаңабаева грант алу байқауына қатысып, биыл өз ісін кеңейту үшін 400 АЕК мөлшерінде грант жеңіп алды. Эко-өнім өндіру бойынша шағын цех ашып, қызметкер санын ұлғайтты. Бүгінгі таңда цехта 4 адам жұмыс істейді. Өнімдер шағын қалада ғана емес, бүкіл облыс аумағында сатылады.
Спрей жасау үшін кәсіпкер жергілікті шикізат көкөністер мен жемістерді, дәрілік шөптерді пайдаланады. Сондай-ақ, оның дүкенінен ашытылған шай, кептірілген шөптер мен алма сірке суын және қолдан жасалған сабын сатып алуға болады. Кәсіпкер келіншек бүгінде «Текелі Эко Маркет» жаңа сауда маркасын құруды жоспарлап отыр. Нәтижесінде ол Жетісу облысынан тыс жерлерде де танымал болуы мүмкін.
Өңірлік кәсіпкерлер палатасының директоры Дәурен Оңалбаев Жанна Жақсылыққызына жаңа мақсаттарға қол жеткізуде табыс тілейді. Іскер әйелдің өнімдері жақын арада халықаралық нарыққа шығады деген үміт бар.
Айгүл Байжұмақызы
Текелі қаласы
