ҚР Цифрлық даму, инновациялар және аэроғарыш өнеркәсібі министрі Бағдат Мусин банк қосымшаларына мемлекеттік қызмет түрлерінің берілуі өз идеясы екенін айтады. Алайда ел ішінде несие алушылардың көбейіп кеткенін министр бұл фактормен байланыстырмайды, деп хабарлайды 7-su.kz желілік басылымы Qaz365.kz сайтының дерегіне сүйеніп.
«Kaspi.kz ол платформа. Біраз адам оны банк деп сынайды. Бірақ ол банк емес, платформа», — дейді Бағдат Мусин Уәде бағдарламасында.
Журналист Ерболат Мұхамеджан не себепті мемлекеттік қызмет түрлері банк арқылы қолжетімді болғанын министрден сұрады.
«Жүйе бір-бірімен байланысты. Ықпалдастырылған. Бір мобильді қосымшаның ішінде барлығы бірге орналасқан. Жеке мәліметтерді жекеменшік, әсіресе қаржылық ұйымға беру қаншалықты дұрыс?» – деп сұрайды журналист.
Бағдат Мусиннің айтуынша, Kaspi.kz платформасына кірген кезде азаматтардан «сіз осы платформаға осы мәліметтерді беру үшін рұқсат бересіз бе?» деп сұрайды. Яғни азаматтың өзі жеке деректерін банк платформасы арқылы қарауға рұқсатын береді.
«Азамат ретінде оған өзіңіз рұқсат бердіңіз. Өзіңіз қайтара аласыз. Осындай мүмкіндікті бердік», — деген Мусин цифрлық құжаттар 2020 жылдан бастап егов мобайл ішіне енгізілгенін айтады.
Журналист осы кезде көп адамның Kaspi.kz арқылы жеке мәліметтерін алуға рұқсат бергені де есінде жоқтығын жеткізеді. Министр алдыңғы жауабын қайта қайталайды.
«Шындығын айтайын, идея менікі. Халықаралық деңгейде біз осыны паш еттік. Қазір басқа халықаралық ұйымдар осыны зерттеп, бұл өте дұрыс бағыт деп баға берді. Сондықтан, осы практиканы басқа мемлекеттерде де, Ресей, Өзбекстанда да беріліп жатыр. Платформаларға шығару ол менің жеке идеям болды. Басқа органдармен бірге осыны талқылап, осындай идеяны жүзеге асырдық», — дейді Мусин.
Десе де бұл тәжірибені АҚШ алмаған. Мусин мұны АҚШ-тағы база деректері орталықтандырылмағанымен түсіндіреді.
«Неге? Өйткені ол федеративті құрылым. Әр штат өзі шешеді. Қазір Калифорния осындай шешімге келіп, олар Apple-ге дейін беріп жатыр. Олардың плафтормалық жүйелері банк арқылы емес, Apple, Meta секілді платформалар арқылы жүргізіледі. Калифорния штаты жүргізуші куәлігін сол арқылы береді», — дейді ол.
Десе де, Ерболат Мұхамеджан Apple, Meta секілді ірі компаниялар қаржылық қызмет көрсетпейтінін, несие бермейтінін еске салады. Ал Бағдат Мусин Каспий банк немесе Халық банк осы деректер арқылы несие беріп жатқанына сенбейтінін айтады. Десе де кредиттің бөлінуіне, ұлғаюына бұл фактор әсер ететінін мойындайды.
Ал халық арасында несие алушылардың көбейіп кеткенін Мусин микроқаржы ұйымдарынан смс-хабарлама көп келетінімен түсіндіреді.
Коллаж: Qaz365.kz
