Бүгінде тұрақтандыру қорына кіретін азық-түлік тауарларының бағасы құбылып тұр. Апта басында картоптың келісі 450 теңгеге дейін көтеріліп, жұртты әбігерге салды. Басқа азық-түлік тауарлары да күрт қымбаттады. Әсіресе, тұрақтандыру қорына жататын азық-түліктердің қымбаттауы облыста бағаны өсірмеуге байланысты ұтымды шаралар қабылдауға итермеледі. Сондықтан 20 қаңтардан бастап «Жетісу» ӘКК» ӨДИ» АҚ Талдықорған қаласы аумағында шағын дүкендер құрып, картоптың келесін 180 теңгеден сата бастады. Дегенмен әр тұтынушы бір ретте 5 келеден ғана сатып ала алады.
Басқасы басқа, кезінде картоп өсірумен даңқы шыққан жетісулықтарға 1 келі картопты 350-450 теңге айналасында сатуы ойланарлық жағдай. Негізінде әлеуметтік азық-түлік түріне жататын бұл өнімнің бағасы негізсіз қымбаттамауы керек. Әрине, оның себебін нақтылап бере алмаймыз.
– Қазір қаланың 7 жерінде әлеуметтік дүкен бар. Ондағы азық-түліктер тұрақтандыру қоры белгілеген бағамен саудаланып келеді. Бүгінде оған қосымша 5 сауда нүктесін ашып жатырмыз. 20 қаңтардан бастап оның екеуі жұмысын бастады. Оның біреуі қала орталығындағы «Dynasty» дүкенінің жанында, енді бірі коттедж қалашығындағы «JLC» дүкенінің жанындағы сауда орнында орналасқан. Бұл жерде картоптың келісі 180 теңгеден саудалануда. Сауда көктем айларына дейін жүргізіледі, – дейді «Жетісу» ӘКК» ӨДИ» АҚ әлеуметтік жобалар департаментінің бас менеджері Сәуле Смағұлова.
«Жетісу» ӘКК» ӨДИ» АҚ-на бағаларды тұрақтандыру үшін 2023-2024 жылдары бюджеттен 9,2 млрд. теңге бөлініп, биыл 31,2 мың тонна әлеуметтік тауарларды жеткізуге шарттар жасалған. Бүгінде оның 12,6 мың тоннасы өткізілсе, қазір 18,6 мың тонна тауар сақтаулы тұр. Бұл өнімдер бүгінге дейін қаладағы 5 әлеуметтік дүкенде, коммуналдық базардағы және «Көкбазар» сауда үйіндегі арнайы орындарда сатылып келсе, енді қосымша ашылған 5 орында да саудаланады.
Мұндағы тауар бағасы нарықтық бағадан орташа есеппен 10-15 пайызға арзан. Мысалы, 1-санатты жұмыртқа 460, күнбағыс майының литрі 510, 1-сұрыпты ұнның келісі 180, күріштің келісі 390, картоптың келісі 180, пияздың келісі 112, сәбіздің келісі 144, тұздың келісі 65 теңгеден сатылады.
Бұл шара азық-түлік бағасы аяқастынан көтеріліп, абдырап қалған жұрттың көңіліне сенім ұялатты.
– Кеше картопты базардан 450 теңгеден сатып алып едім. Міне, бүгін одан 3 есе арзан бағамен алдым. Сәбіз, пияз, күріштің бағасы базардағы бағадан 10-15 пайызға арзан. Сапасы да жақсы. Әдетте Бақанастың күрішін таба алмаушы едік. 5 келі күріш сатып алдым, – дейді қала тұрғыны Элмира Смағұлова.
Қазір қаладағы азық-түлік сататын сауда дүкендеріне тексеріс басталды. Егер бағаны негізсіз көтергендер анықталса, жауапкершілік арқалайтын болады.
