Облыстық прокуратура білім беру ұйымдарын кешенді тексеруді ұйымдастырды. Өңірлік кәсіпкерлер палатасы жанындағы жеке білім беру кеңесі шеңберінде бизнес субъектілеріне осы тексерудің мақсат-міндеттері туралы түсіндірілді.
ҚР Президентінің және Бас Прокурордың тапсырмасына сәйкес, бүкіл ел бойынша меншік нысанына қарамастан, білім беру саласында кешенді прокурорлық тексерулер басталды. Осыған байланысты кәсіпкерлік субъектілеріне қадағалау органдары тарапынан түсініктеме берілді. Тексерушілердің құрамына санитарлық-эпидемиологиялық бақылау, полиция, төтенше жағдайлар, техникалық реттеу және метрология, білім беру, медициналық және фармацевтикалық бақылау, еңбек инспекциясы басқармасы, жұмыспен қамтуды үйлестіру және әлеуметтік бағдарламалар басқармаларының өкілдері тартылды.
Әрбір мемлекеттік орган өз құзыреті шеңберінде тексеру жүргізеді. Облыстық прокуратураның аға прокуроры Айдар Шабдаров тексеру кезінде мақсаты балалардың өмірі мен денсаулығының қауіпсіздігін қамтамасыз ету, сондай-ақ олардың кез келген жазатайым оқиғаға ұшыруына, суицидтің өсуіне ықпал ететін жағдайлардың себеп-салдарын анықтау екенін айтты.
Айдар Шабдаровтың айтуынша, тексеру мерзімі тіркелген сәттен бастап 1 ай ішінде белгіленеді. Қосымша мәліметтер алу қажет болған жағдайда тексеру тағы бір айға ұзартылуы мүмкін. Тексеруде алдыңғы, былтырғы және осы жылдың ағымдағы кезеңінің құжаттары қамтылған. «Анықталған бұзушылықтарды жоюға уақыт беріле ме?» деген сұраққа прокуратура өкілі бұзушылықтар тексеру кезінде жойылуы мүмкін екенін атап өтті. Егер бұзушылықтарды жою мүмкін болмаса, оларды түзетуге уақыт немесе мемлекеттік сатып алуды өткізу үшін қаражат талап етілсе, онда мұндай жағдайда оларды жою тәртібі көзделеді.
Тексеру жүргiзу басталғанға дейiн қаулы уәкiлеттi органда тiркеледi. Бұл туралы нормативтiк құжаттарда және кәсiпкерлiк кодексте көрсетiлген. Тексеру басталар алдында субъектіге тіркелген акті, прокуратура органдары тағайындалған тексерудің мәні, оны жүргізу мерзімі, кезеңі, тексерушілердің тізбесі, осы тексеруді тіркеген және оған қол қойған органның басшысы көрсетілетін тексеруді тағайындау туралы қаулы береді. Тексеру туралы құжат ҚР Прокуратура органдарының бірыңғай жүйесінде тіркеледі.
Өңірлік кәсіпкерлер палатасының директоры Дәурен Оңалбаев салалық кеңес мүшелері кешенді прокурорлық тексеруге тартылған мемлекеттік органдардың барлық маманын шақыра отырып, тексеру регламентін түсіндіру үшін кездесу өткізу туралы ұсыныс жасады.
Саида Хаджимуратова,
облыстық кәсіпкерлер палатасының баспасөз хатшысы
