Алматы іргесіндегі Іргелі ауылдық округінің тұрғындары мен атқамінерлері үшін Көксай ауылының маңында пайда болған заңсыз қоқыс алаңы бас ауруына айналғалы біраз болған. Бұған себеп осындағы жер телімдерінің мақсатсыз пайдаланылуында. Облыстан арнайы келген комиссия мүшелері жер иелерімен кездесіп, істің түйінін бірлесе шешудің жолдарын қарастырды.
Облыстық энергетика және тұрғын үй-коммуналдық шаруашылығы басқармасы басшысының орынбасары Асқар Кенженов пен аталған басқарманың бөлім басшысы Данияр Исқақов жетекшілік жасаған тексеріске ауданның тұрғын үй-коммуналдық шаруашылығы және тұрғын үй инспекциясы, қоғамдық денсаулық сақтау, экология, жергілікті полиция қызметі сияқты мекемелердің өкілдері қатысты. Олар жекеменшікке тән жердегі қоқыс алаңында Іргелі округінің әкімі Қадырбек Атшаба- ровпен және жер иелерімен бірге мәселені талқылады.
Облыстық экология департаментінің мемлекеттік инспекторы Айдын Адаминнің айтуынша, мәселе екі жер телімінде болып тұр. Бірінің аумағы 10,4 гектар болса, екіншісі – 5,2 гектар. Тегіс емес болғандықтан кезінде қожайындары жердің ой-шұңқырын толтыру үшін топырақ, құрылыс және тұрмыстық қалдықтарды қабылдаған. Бірақ мұны рұқсатнама құжаттарынсыз, заңсыз жасаған. Бастапқы мақсаты шаруа қожалығын жүргізуге арналған жер телімдері уақыт өте келе осылайша қоқыс алаңына айналып шыға келді. Әдетке айналған қоқыс төгуді енді ешкім тоқтата алмай отыр. Сол үшін жер иелеріне учаскелік полиция инспекторлары бірнеше рет айыппұл төлеткен. Ауылдық округ әкімдігінің басшылығы әкімшілік жазаға тартылған. Қазіргі кезде бұл іске облыстық прокуратура араласып, қылмыстық іс қозғалғандықтан, әзірге қандай да бір әкімшілік шара қабылдауға болмайды.
Бұған жақын маңда орналасқан өндіріс орнының иелері қол ұшын созуға әзір. Кірпіш, төсеніш тас, мәрмәр тас шығаратын кәсіпорында жұмыс істейтін олар жолға құм-тас төсеп, аумаққа абаттандыру жұмыстарын жүргізіп, кіреберіске шлагбаум орнатыпты. Оған қоса, өз есебінен су тасымалдауды жолға қойып, ертелі-кеш жолға су шашады. Бұл осында еңбек ететін кәсіпкерлер мен ауыл тұрғындарын күресіннен көтерілетін шаң-тозаңнан қорғайды. Кәсіпкерлер өз есебінен техника жалдап, қоқыс бетін топырақпен жабуға уәде берді. Сонымен қатар олар құнарлы топырақ қабылдау туралы келіссөздер жүргізіп жатыр. Осылайша қоқыс алаңын ішінара рекультивациялап, кейін бұл жерге ағаш, басқа да өсімдіктер егуге болады. Комиссия мүшелерімен кездесіп, түйінді тарқатуға ниеттенген кәсіпкерлердің қатарында Көксай ауылының тұрғындары Есен Тілеухан мен Мейірбек Еркебаев та болды.
Округ әкімшілігінің ғимаратында акт толтырылып, рейд барысында айтылған ұсыныс-шешімдер хатталды. Жергілікті атқарушы органға, яғни Іргелі ауылдық округінің әкімшілігіне, ауданның тұрғын үй-коммуналдық шаруашылығына және тұрғын үй инспекциясына, жергілікті полиция қызметіне мониторинг жүргізіп, заңсыз күресін орнын рекультивациялау жұмысының барысы жайлы әр он бес күнде ақпарат беріп тұру, ауыл әкіміне аталған жұмысты ұйымдастыру тапсырылды. Шлагбаумды мықтау, тұрғындар арасында ақпараттық-түсіндіру жұмыстарын күшейту, белгіленбеген орындарға қоқыс төгудің әкімшілік жауапкершілігі туралы билборд орнату сияқты жұмыстар белгіленді.
Серік САТЫБАЛДИЕВ.
