Қазақстан Республикасы Бәсекелестікті қорғау және дамыту агенттігінің Жетісу облысы бойынша департаменті өңірдегі көмірді бөлшек саудада өткізу нарығына жоспардан тыс талдау жұмыстарын аяқтады, – деп хабарлайды 7-su.kz ақпараттық порталы.
Қысқы жылыту маусымында көмірдің қолжетімділігі мен бағасы – әрбір тұрғын үшін өзекті мәселе. Осыған орай, мамандар 2024 жыл мен 2025 жылдың 31 қазанына дейінгі кезеңді қамтитын ауқымды зерттеу жүргізді. Бұл тексерістің басты мақсаты – нарықтағы бағаның негізсіз өсуіне жол бермеу және ірі кәсіпкерлердің өз өкілеттігін асыра пайдалануын бақылау.
Жүргізілген талдау нәтижесіне сүйенсек, Талдықорған қаласының аумағында көмірді бөлшек саудада сату нарығы орташа шоғырланған (ІІ түрі) нарықтар санатына жатады. Бұл дегеніміз – сауда саласында бірнеше ірі ойыншылармен қатар, бәсекелестік ортаны қалыптастырып отырған басқа да кәсіпкерлердің бар екенін көрсетеді.
Бәсекелестіктің бұл деңгейі тұтынушылар үшін тиімді. Өйткені нарықта монополияның болмауы бағаның бір қолда шоғырланбауына және халыққа сапалы тауарды таңдауға мүмкіндік береді. Департамент мамандары талдау барысында нарық субъектілерінің үстем немесе монополиялық жағдайын анықтап, заң бұзушылықтардың алдын алуға басымдық берді.
Талдау барысында тек сандар ғана емес, сонымен қатар нарықтағы кедергілер де қаралды. Көмір бағасының негізсіз өсуіне жол бермеу, ірі жеткізушілердің шағын кәсіпкерлерге қысым көрсетпеуін қадағалау, жаңа бизнес өкілдерінің нарыққа еркін кіру мүмкіндігі қамтамасыз етілді. Егер нарықта бәсеке болса, жеткізушілер тұтынушыны жоғалтып алмау үшін қызмет көрсету сапасын арттырып, бағаны нарықтық тепе-теңдікте ұстауға тырысады.
Департаменттің мәліметінше, 2024-2025 жылдар аралығында Талдықорған қаласында көмір нарығындағы жағдай тұрақты. Бұл бағыттағы бақылау шаралары алдағы уақытта да тұрақты түрде жүргізіліп тұрады.
