ЭКСПО тарихы техника атаулының тетігін түгендеген тұңғыш Лондон көрмесіне барып тіреледі. Бұл енді кешегі ақиқат дерсіз. Одан бері де айтулы көрме өз кереметін талай рет танытты. Араға мезет салып кідіріссіз ұйымдастырылып отырды.
Ең қызығы сол – әлемдегі алпауыт елдердің алдыңғы легі бұл көрмені әрқайсысы жеке-жеке он ретке жуық дүрілдете өткізіп үлгерсе де өз тараптарынан мұндай ірі шараға толған, тойған рай танытпапты әзірге. Бәрі де алдағы көрмелер көмбесіне таласып-тармасулы.
Мұның бәрін неге айтамыз? Өйткені, хақтың нұры түскен қазақ елі 2017 жылы жаз айында өтетін әйгілі Халықаралық көрме – ЭКСПО-да өзінің барын, байлығын, бақуатын көрсетуге мүмкіндік алып отыр. Аталған шара 337 күннен соң болмақ. Әрине, үлкен міндеттің үдесін ескерсеңіз, бұл тым қысқа уақыт. Біз бұған дейін өз топырағында ЭКСПО қызығының «дәмін» татпаған елміз. Кешегі кезекті «ЭКСПО-2015» Миланға дейінгі аралықта атақты көрменің дақпыртымен, аңыз-әфсанасымен ғана танысып өттік. Ендігі жерде ше? Бізді онда не күтеді? Бар қазақтың бұл көрмені көруге мүмкіндігі бар ма?.. Осындай сан сауалға жауап беру үшін негізгі-негізгі дүниелерді екшеп айтқанды жөн көрдік.
Біріншіден, қазақ елі Ұлы Дала өркениетінің алтын қамбасын жалпақ жаһанға жарқырата ашады. Жалт-жұлт еткен жауһарлары көзбен қатар көңілді де арбары шүбәсіз. Алып тарихына арқау болған Алтын адамынан тартып, түбін түркіге түгендеткен тастағы таңбалы жазуларға дейінгі таңғажайып экспонаттардың туристердің таңдайын тақылдатары сөзсіз.
Екіншіден, бүгінде он мыңдаған жұмысшы саусағының табы қалған, түрлі сала бойынша 30 мың қызметкердің басы біріктірілген Астана ЭКСПО кешені сізді қабылдайды. Сізбен қоса қазақ даласын бір көруге асық болған жүздеген елдің азаматы ағылады. Сөйтіп, болашақтың жасыл энергиялы қалашығы – “ЭКСПО-2017” көрмесі өз кереметін паш етеді мұнда. Мәйегі бүтін мәдени мұралар, тіпті кейінгі техникалық прогрестің пошымын көз алдыңызға әкелетін соңғы үлгідегі озық технологиялар, заманауи тетіктер – бәрі-бәрі сіздің көз алдыңыздан өтеді.
Үшіншіден, ұлы қазақ елін бүкіл әлем боямасыз, жарнамасыз таниды. «ЭКСПО көрмесі әлемдік деңгейдегі спектакль сияқты» деп кім айтқанын қайдам, осы әлемдік деңгейдегі “театр сахнасында» Қазақстанның өз тұлғасын сәтті сомдайтыны даусыз. Оған себеп, әуелі Бүкіләлемдік туристік ұйым (ВТООН) «ЭКСПО-2017» көрмесі аясында 2017 жылдың маусым айының аяғына таман «Туризм және Болашақ энергиясы» атты бірлескен конференция өткізбек. Мұндай айтулы шараға қазірге 150-ден астам мемлекеттің туризм министрлері қатысады деп жоспарланған. Осыдан-ақ, көп нәрсені байқауға болар. Бұған қоса, тағы бір айта кетерлік жайт – Халықаралық көрме бюросы бекіткен негізгі бағдарламалық құжатқа сәйкес 147 млн. еуро демеушілік қаражат тарту жоспарланса, қазіргі уақытта қазақстандық және шетелдік компаниялар есебінен 100 млн.еуроға шарттар мен меморандумдар бекітіліпті. Бұдан бөлек, 244 млрд. теңге инвестиция тартылып отыр.
Осылайша «Болашақтың энергиясын» өзіне тақырып етіп алған біздің «ЭКСПО – 2017» әлемге қазақ атын мәшһүр етпек. Бүгінде көрме билеттері сатыла бастады. Осы арада оқырманның білгісі келген бір ақпаратты ұсына кеткеніміз артық болмас. Ресми ақпараттар көрмеге кіру құны киноға билет құнынан аз ғана жоғары болатынын айтуда. Демек, тұтас Қазақстан халқы еліміздің ертеңі болған алып «ЭКСПО-2017» аралап қайтуға мүмкіндік алады.
Қозыбай Құрман
