Кезінде бес мыңға жуық адамды жұмыспен қамтып, одақ көлемінде аты аңызға айналған Текелі қорғасын-мырыш комбинатының тығырықтан шығып, қайтадан бойын тіктейтініне текеліліктердің де сенімі азая бастағаны құпия емес еді. Алайда, елімізге белгілі кәсіпкер техника ғылымының докторы Әбдіраман Еділбаев құрылтайшы болып, кәсіпорынның жұмысын қалпына келтіруді қолға алғалы «Текелі кенді қайта өңдеу кешені» ЖШС-де айтарлықтай істер тындырылып, жақсы жобаларды жүзеге асыру жолында тың талпыныстар айқын аңғарылуда. Бұған тарауға тақау қалған кешеннің бүгінгі таңда аяғынан тұрып, еңсесін тіктей бастағаны айқын дәлел болса керек.
Атап айтсақ, біріншіден, мұнда байыту фабрикасын қалпына келтіру барысында оның жабдықтары толық жаңартылып, 600 мың доллардан астам қаржыға жаңа жабдықтар орнатылды. Соның арқасында фабриканың өнім шығару көлемі екі есеге ұлғайып, енді жылына 720 мың тонна кен өңдеу мүмкіндігіне ие болды. Кешен бүгінгі таңда Қарағанды облысындағы Бапы кен орнынан тасымалданған құрамында темір араласқан концентратты өңдеп, іргелес Қытайға сатумен айналысуда. Дегенмен, өнімді шикізат түрінде өткізуден гөрі, темірге немесе шойынға айналдырып сатса анағұрлым пайдалы болатынын ескерген кешен басшылары осы бағытта тиімді жобалар ойластыра бастады. Осы мақсатта мұнда Текелі кенді қайта өңдеу кешенінің негізінде «Текелі металлургия зауыты» жобасын жүзеге асыру қызу қолға алынып жатыр. Жалпы инвестиция сомасы 38 млн. доллар болатын бұл жобаны «Кэй Эс Пи Стиль» Павлодар құбыр зауыты қаржыландыруда. Жобаның түпкі мақсаты – жылына 400000 тонна шойын өндіруге қабілетті өндіріс комбинатын құру.
– Қазір бір домна пешінің құрылысы аяқталып қалды. Екіншісінің іргетасы көтерілді. Кешеннің негізінде шойын шығару зауытын іске қосу қаламызға да, өңірімізге де өте тиімді. Өнімнің рентабельділігі жоғары болады, қосымша 400-ге тарта жұмыс орнын ашамыз. Тағы бір артықшылығы, бүгінгі өндіріп отырған концентратқа қарағанда, өткізілім құны төрт есе артық болады деп күтілуде. Осы басымдықтардың бәрі бұл жобаның тек қаржы жағынан ғана емес, сондай-ақ, әлеуметтік тұрғыдан да тиімділігін көрсетіп отыр. Ал енді зауыттың тәулік бойына тоқтаусыз жұмыс істеуін қамтамасыз етуге шикізатымыз ұзақ жылдарға жетеді. Өйткені, қазіргі байыту фабрикасының өңдеп жатқан Бапы кен орынның темірқұрамды кенінің қоры мол. Тек қана оны кеңейту жұмыстарын атқаруымыз керек. Бұл тиімділігі жоғары жобамыз республикалық деңгейде талқыланып, мақұлданды. Қазірге дейін жобаның 7113 млн. теңгесі игеріліп, жобалау және жалпы құрылыс жұмыстары аяқталды. Ал жабдықтарды монтаждау жұмыстары 90% орындалды. Қазір инженерлік жүйелер мен іске қосу, реттеу жұмыстары жүзеге асырылуда. Жыл аяғына дейін бірінші кезекте байыту фабрикасы, №1 домна пеші мен агломерациялық цех іске қосылады. Ал, жобалық қуаты деңгейіне жеткенде 400000 тонна шойын өндіріле бастауы тиіс. Сонда кәсіпорынның тоқтаусыз әрі сенімді жұмыс істеуіне мол мүмкіндік туады және текеліліктердің арасынан қосымша бес жүзден астам адамды жұмыспен қамтитын боламыз, – деп егжей-тегжейлі әңгімелеп берді кешендегі қарбалас қимылдың бел ортасында жүріп, барлық жақсы бастаманың басы-қасынан табылып жүрген кешен директоры Бақыт Шалбаев.
Әзірше 500 адамды жұмыспен қамтыған кешеннің бүгінгі қолға алып жатқан жобалары жүзеге асса, жұмысшылар қатары 1000-нан асады екен. Жалпы кәсіпорында өз жұмысшыларына ұдайы қамқорлық көрсетіліп отырады. Әкімшілік кәсіподақ комитетімен бірлесіп, тілек білдірушілерді әрбір сенбі, жексенбі сайын әрлі-берлі жолын кәсіпорын есебінен өтеп, Балқаш көлінің жағасында жасақталған демалыс аймағына жіберіп отырады. Бұрын жабылып қалған асхана күрделі жөндеуден өткізіліп, пайдалануға берілген. Кешенде өнегелі істерімен өндірісті өрге сүйреуге өз үлестерін қосып жүрген озаттар қатары көптеп саналады. Солардың қатарында жабдықтар жөндеу жөніндегі шеберлер Ерлан Сүлейменов пен Саян Смағұлов, энергетик Василий Цапенко, электрмен және газбен дәнекерлеушілер Михаил Бридихин, Асхат Сәлімжанов, Еркебұлан Оспанов, жөндеуші-слесарьлар Ерсайын Қалиев, Виктор Авраменко, Святослав Сухорученко, бетондаушылар Нығмет Заманбеков, Александр Лампель, бетон араластырғыш қондырғының машинисі Кенжебек Баймұхамбетов, оператор Евгения Просолова, зертханашы Марина Рябова, тепловоз машинисі Михаил Куринный, жүргізуші Қайрат Жұртбаев және басқалары бар.
Шора БАТЫРБАЕВ.
