Сот жұмысын жақсарту, судьялардың жүктемесін азайту мақсатында қолға алынған шараның бірі – нотариустың атқарушылық жазбасы. Атқарушылық жазба жасаудың тәртібі ҚР «Нотариат туралы» Заңымен реттеледі.
Атқарушылық жазба – нотариустың борышкерден өндіріп алушыға тиесілі белгілі бір ақша сомасын өндіріп алу немесе жылжымалы мүлікті талап ету туралы өкім. Өндіріп алушы мүддесінде атқарушылық жазба жасалатын тұлға, борышкер белгілі бір ақша сомасын өндіріп алу немесе атқарушылық жазба негізінде өзге де жылжымалы мүлікті талап ету ұсынылатын тұлға саналады. Берешекті өндіріп алу үшін атқарушылық жазба даусыз талаптардың 10 түрі бойынша жасалады.
Егер атқарушылық жазба берілетін талап үшін Қазақстан Республикасының заңнамасында өзге ескіру мерзімі белгіленсе, атқарушылық жазба осы мерзім шегінде беріледі. Мысалы, 2017 жылдан бастап ҚР «Банктер және банк қызметі туралы» Заңының 37-бабына 5 жылдық талап қою мерзімін белгілеу бөлігінде өзгерістер енгізілді. Сондай-ақ, «тұрғын үй қатынастары туралы» ҚР Заңы бойынша 2011 жылғы 22 шілдеден бастап кондоминиум объектісінің ортақ мүлкін күтіп-ұстауға арналған міндетті шығыстарға қатысудан жалтарған үй-жайлардың (пәтерлердің) меншік иелерінен берешекті өндіріп алу туралы талап қою мерзімі қолданылмайды. Бұл ретте борышкер заңды тұлға саналса онда оның тіркелген жері не тұрақты жұмыс істейтін орны орналасқан жері бойынша жүргізіледі. Егер шартта борышкердің (жеке тұлғаның) тіркелген жері мен тұрғылықты жерінен өзгеше мекенжай көрсетілсе, онда атқарушылық жазбаны нотариус шартта көрсетілген борышкердің мекенжайына сәйкес қызметінің аумағында орындай алады. Борышкер атқарушылық жазбамен келіспесе, жазбаны алған күннен бастап 10 жұмыс күн ішінде атқарушы жазбаны жасаған нотариусқа хабарламасы бар мәлімделген талапқа қарсы жазбасын жіберуге құқылы.
Серік ЕРКІМБАЕВ
Жетісу облысы нотариаттық округінің нотариусы
Фото: syrboyi.kz
