Күлімдеген көктеммен қатар келген Халықаралық әйелдер мерекесінде жетісулық аруларды Ілияс Жансүгіров атындағы Мәдениет сарайында облыс әкімінің міндетін атқарушы Лаззат ТҰРЛАШОВ құттықтады. Салтанатты шараға тыл еңбеккерлері, қоғам қайраткерлері, көп балалы аналар мен түрлі салада еңбек етіп жүрген нәзік жандар қатысты.
Ұрпағын өрбітіп, қара қазанын қайнатып, отын маздатып, қысылғанда еріне демеу, еліне медеу болған АНА – ежелден шаңырақтың алтын қазығы. Алтын әріппен жазылған тарихымыздағы аумалы-төкпелі заманда өнегелі ісімен ел-жұртқа үлгі болған, Отан үшін от кешкен батыр қыздар есімі аңызға айналды. Бүгінде облыс халқының тең жартысын құрайтын әйелдер қауымы әр салада жемісті еңбек етуде. Мемлекеттік қызметте 7 мың 549 қызметкер болса, оның 48,7 пайызы нәзік жандылармен толыққан.
Кездесуде сөз алған облыс әкімінің міндетін атқарушы аналарға ақжарма тілегін арнады:
– Халқымыз қашанда ананы ардақтап, қыз баланы ерекше құрметтеген. «Ақ бесіктің иесі, туған жердің киесі», – деген бабалар тәмсілі соның дәлелі. Әйел, отбасы, қоғам – бұл үшеуі өзара тығыз байланысты. Әйел – ең алдымен, ұрпақ бақытына, өз шаңырағына, Отанымыздың болашағына жауапты тұлға. Тарих беттерінде асыл аналарымыздың салған сара жолымен біздің ұрпақ жүріп келеді. Бүгіннің өзінде қоғамдық өмірдің кез-келген саласын әйелдерсіз елестету мүмкін емес. Отбасы ошақ қасында білек сыбана іс тындырып қана қоймай, қоғамдағы ауыр жүкті арқалап келген асыл жандардың еңбегі ерен. Өңіріміздегі ауылшаруашылығын дамытып, өркендетуге лайықты үлес қосқан Еңбек Ерлері Зылиха Тамшыбаева, Күләш Айтжанова, Мәрия Аябаева, Күлдария Тоқсейітова, Адалят Зайнаудинова, Рахилям Сейітова, Вера Лютова, Зәкария Сейітова, Мәмилә Әлімбаева және облыстың Құрметті азаматшалары Бәтима Сақауова, Күләш Түменбаева, Күмісжан Өмірбаева, Қалима Жазылбекова, Марьян Байқанова, Дина Нұрғалиева, Ұлтуған Жаутікова сынды аналарымыз ел мақтанышына айналды. Осындай аналарымыз бар біз бақыттымыз. Ержүрек батыр да, қаламы жүйрік ақын да, данышпан ғалым да, ел басқарған көсем де алтын құрсақты Ананың перзенті. Сұлулық пен нәзіктіктің иесіне айналған Сіздерді осынау мерекемен облыс әкімінің және барша жетісулықтың атынан шын жүректен құттықтаймын, – деді Лаззат Махатұлы.
Құттықтау сөзден соң облыс әкімінің міндетін атқарушы сарқандық Аружан Нұрғазиеваға, кербұлақтық Жанар Шұғыловаға, Панфилов ауданының батыр анасы Бақытгүл Илиповаға «Алтын алқа», ал Қарасай ауданының тұрғыны Сәттігүл Мұсабекова мен райымбектік Өкіл Мирасқа «Күміс» алқа төсбелгілерін табыстап, бірқатар азаматшаларға облыс әкімінің Құрмет грамоталары мен алғыс хаттарын ұсынды.
Өз кезегінде жиынға қатысушы қонақтар тарапынан, атап айтсақ, Іле аудандық аналар кеңесінің төрайымы Ғалия Нәдірбекова, облыстық «ЭЛЕФТЕРИЯ» гректер қоғамының мүшесі Наталья Тифанциди сөз алып, атқарылып жатқан игі істерге оң бағаларын беріп, облыс әкімдігіне аналар атынан өз ризашылықтарын жеткізді. Ал қазақ елінде дүниеге келіп, өмір сүргенін зор мақтаныш санайтын Рио-де-Жанейродағы Олимпиада ойындарының қола жүлдегері Карина Горичева еліміздің көк Туын әлемде желбіретіп, алтыннан алқа алып, елін қуантатынына уәде берді.
Жиын соңында өңіріміздің өнер жұлдыздары аналарға, әйелдер қауымына арнап ән шырқап, залда жиналған нәзік жандыларды өз өнерімен тәнті етті.
Еңлік КЕНЕБАЕВА
