Қасым-Жомарт Тоқаев Корея Республикасы президентінің арнаулы өкілі – президент әкімшілігінің басшысы Кан Хун Шикті қабылдады, – деп хабарлайды 7-su.kz ақпараттық порталы.
Кездесу барысында Мемлекет басшысы Корея Республикасын Қазақстанның негізгі стратегиялық серіктестерінің бірі ретінде атап өтті. Ол екіжақты ықпалдастықтың қарқынды дамып келе жатқанына жоғары баға беріп, Астана кеңейтілген стратегиялық серіктестікті одан әрі нығайтуға ниетті екенін жеткізді. Сондай-ақ Президент Қазақстанның корей халқына және Корея Республикасының даму деңгейіне құрметпен қарайтынын айтты.
Қасым-Жомарт Тоқаев Кан Хун Шиктің арнаулы өкіл ретіндегі сапарының маңыздылығына тоқталып, Корея Республикасының президенті Ли Чжэ Мёңге ыстық лебізін жолдады.
«Сіздің сапарыңыз қазақ-корей ықпалдастығын одан әрі нығайту тұрғысынан өте маңызды. Бірлескен күш-жігердің арқасында елдеріміздің ынтымақтастығы арта түсетініне сенімдімін», – деді Мемлекет басшысы.
Өз кезегінде Кан Хун Шик қонақжайлық үшін алғыс айтып, Қазақстанда жаңа Конституцияны қабылдау бойынша өткен референдумның табысты өтуіне орай президент Ли Чжэ Мёңнің құттықтауын жеткізді.
Арнаулы өкіл Корея Республикасының сауда-экономикалық және инвестициялық байланыстарды күшейтуге, сондай-ақ түрлі саладағы бірлескен жобаларды іске асыру арқылы өзара қарым-қатынасты жаңа деңгейге көтеруге мүдделі екенін мәлімдеді.
Кездесу барысында энергетика, көлік-логистика салаларындағы ынтымақтастықты кеңейту перспективалары, сондай-ақ жаһандық нарықтағы қазіргі сын-қатерлер аясындағы өзара іс-қимыл мәселелері талқыланды.
Кездесу соңында Кан Хун Шик Қазақстан Президентін Корея Республикасына ресми сапармен келуге және биыл қыркүйекте Сеулде өтетін «Корея – Орталық Азия» саммитіне қатысуға шақырды.
Қасым-Жомарт Тоқаев аталған шақыруды қабыл алып, алдағы жоғары деңгейдегі келіссөздер екі ел арасындағы ынтымақтастықты жандандыруға және «Орталық Азия – Корея Республикасы» форматындағы өзара іс-қимылды дамытуға ықпал ететініне сенім білдірді.
