Әлемді әбігерге салған пандемияның қаһары қайтпай тұрғаны анық. covid – 19 індетінің екінші толқыны күн суыта қайта белең алады деп күтілуде. Осыған байланысты қатерлі дерттің алдын алып, онымен күресті жандандыру мақсатында қытайлық CNPC компаниясы мен отандық «ҚазМұнайГаз» ұлттық компаниясы бірлесе отырып, Алматы облысына 50 оттегі концентраторын тарту етті.
Аталған шараға қатысқан облыс әкімінің орынбасары Батыржан Байжұманов екі ел арасындағы әріптестік негізінде қазақстандық денсаулық сақтау саласына көмек көрсетіп отырған қытайлық компания өкілдеріне алғыс білдіріп, жұмыстарына табыс тіледі. Өз кезегінде сөз алған «CNPC International Kazakhstan LTD» компаниясының бас директоры Ли Юнг Хонг Қытай мен Қазақстан арасындағы экономикалық, мәдени байланыстардың дамып келе жатқанын тілге тиек етіп, дүниені дүбірге бөлеген дертпен бірлесе күресудің маңыздылығына тоқталды.
Қайырымдылық шарасын ұйымдастырып отырған CNPC компаниясы елімізде 1997 жылдан бері мұнай өндіру саласында еңбек етіп келеді. Әлемдік кеңістікте аталған салада көшбасшылардың қатарынан көрініп келе жатқан компания 20 жылдан аса уақытта Қазақ- станның мұнай мен газ өндірісіне 45 млрд. АҚШ доллары көлемінде инвестиция құйып, ел бюджетіне едәуір салық пен өзге де төлемдер төлеген екен. Сонымен бірге әлеуметтік жобаларға 400 млн. доллар қаржы жұмсаған. Алдағы уақытта атқарылар жұмыстардың көлемі де ауқымды көрінді.
Ресми шараның соңына қарай журналистерге сұхбат берген Батыржан Құлаймергенұлы қытайлық CNPC компаниясы мен отандық «ҚазМұнайГаз» ұлттық компаниясы бірлесе отырып сыйға тартқан 50 оттегі концентраторы облыстағы ауруханаларға бөлініп берілетінін айта келіп, пандемияның болуы мүмкін екінші толқынына облыс бюджетінен қосымша 7,3 млрд. теңге бөлінгенін айтып өтті. Бұл қаржы ең алдымен ауруханалардың материалдық-техникалық жабдықталуына жұмсалатын болады. Атап айтқанда, ауруханалардың жанынан 10 оттегі стансылары салынып, 180 “Жедел жәрдем” көлігі, 3 компьютерлік томограф, 100-ден аса өкпені жасанды желдету аппараты, осыншама оттегі концентраторы алынатын болады. Осылайша өлкеміздегі денсаулық сақтау саласы қажетті жабдықтрмен 89 пайыз қамтамасыз етіледі деп күтілуде.
Қуат ҚАЙРАНБАЕВ
