Жетісу облыстық Мұхаметжан Тынышбайұлы атындағы тарихи-өлкетану музейінде «Музей – өңір тарихы мен ұлт руханияты» атты мерекелік шара өтті. Мәдени шара қазақтан шыққан тұңғыш кәсіби теміржолшы-инженер, мемлекет және қоғам қайраткері, тарихшы М. Тынышбайұлының 145 жылдығына, облыстық музейдің құрылғанына 50 жыл толуына және музей қызметкерлерінің төл мерекесі 18 мамыр – Халықаралық музейлер күніне орай ұйымдастырылды.
дың құттықтауы мен музей қызметкерлерін марапаттаудан тұратын ресми бөлімі музей ауласында өтіп, музей фойесіндегі «Ұлт мұратын ұлықтаған Мұхаметжан» атты көрменің ашылуымен жалғасын тапты. Көрме «М. Тынышбайұлының Сталинге жазған хаты» атты сахналық көрініспен басталып, тарихи тұлғаның тағылымды өмірі мен елеулі еңбек жолын аға ғылыми қызметкер Еркін Стамшалов презентациясында таныстырды.
Музейдің «Көне және орта ғасырлық тарих» залында ХVІІІ ғ. өмір сүрген әулие, емші, қобызшы, көріпкел, ұста Көтен тәуіп Қоңырбайұлына арналған тұрақты экспозициялық комплекстің ашылуы өткізіліп, қобыз аспабымен Абыздың күйі «Толғау» орындалды.
– Музей – кешегі тарихты бүгінгі күнмен байланыстырып, оны кейінгі ұрпаққа ұлықтайтын, сынаптай сырғыған уақытты пайдалы өткізуге, таным көкжиегін кеңейтуге мүмкіндік беретін əмбебап орталық. Əр музей өз алдына бояуы қанық, айтар ойы анық өзгеше бір əлем. Бүгінгі орайлы сəтті пайдалана отырып, қордағы материалдарды тіркейтін, экспонаттарды сақтау мен оларды халыққа таныстыруға дейінгі көзге көрінбейтін жұмыстың бəрін істейтін сала қызметкерлерінің ұшан-теңіз еңбегіне алғыс айтамын. Алдағы уақытта да бірнеше дәуірдің тарихын, этнографиясын, тарихи тұлғаларын, өнерін жинақы түрде ұсынатын, жинақталған мұраны ғылыми айналымға енгізетін музейдің қызметі жанданып, келушілердің қатары қалың болсын, – деді облыстық мәдениет, архивтер және құжаттама басқармасының басшысы Қуаныш Сүлейменұлы.
Шараға арнайы Астана қаласынан келген музейтанушы маман Нұрсерік Жолбарысұлы, Көтен тәуіп Қоңырбайұлының ұрпақтары, ардагерлер, облыстық мәдениет, архивтер және құжаттама басқармасының мамандары, зиялы қауым өкілдері қатысты.
Айғаным АЙТМҰХАН
