Шәкіртінің әр жетістігі – ұстаз үшін бір қуаныш. Өз уақытын аямайтын, өзгенің уақытын аялайтын жанның еңбегі қашанда құнды, бағалы. Заман ағымымен, қоғаммен бірге жасасып, түрленіп отыратын ән өнерін, қазақы бояуын сіңдіріп, қалпынан ажыратпай елге ұсынып, жаһандық жарыстарда таныстырып келе жатқан жас ұстаз, халықаралық байқауларда ел намысын қорғап, топ жарып жүрген шәкірттер тәрбиелеген Ілияс Шұғайдың бейнесін ашып көрмекпіз.
Франция астанасы. Қазақтың ұлы теноры Әміре Қашаубаевтан кейін өнер астанасы қазақ әнін, әншілерін жоғары бағалайды. Егемендік алған жылдары да қаншама талантты әншілеріміз өз өнерлерін мойындатты. Былтыр «Париж, мен сені сүйемін» атты халықаралық ән байқауында жұдырықтай қазақтың баласы Шәмшінің «Ақжайық» әнін айтып, бірінші орын алды. Жарысқа қатысқан 300-ден астам өнерпаздың арасынан ауылдан шыққан Мұқатай Дидардың шеберлігі жоғары болды.
Сол сәтте жас ұстаз Ілияс Шұғайдың еңбегі бағаланды. Ақсу ауданы, Ілияс Жансүгіров ауылындағы Исатай Исабаев атындағы өнер мектебінде ұстаздық қызмет істеп жүргеніне биыл үш жыл толатын ұстаздың алғашқы қадамы дәл осындай ірі жетістікпен басталды.
Ізденімпаз ұстаздың тағы бір шәкірті биыл да Парижді таңғалдырып қайтты. Тоғыз жастағы Гауһар Оразғалиева «Құтты ұям» әнімен халықаралық жарыстың бірінші орнын жеңді. Ілияс қазір Талдықорғандағы Ақын Сара атындағы өнер мектебінде де қызмет істейді. Екі жақта да шәкірт тәрбиелеп, балалардың талантын ұштап жүрген жас ұстаздың еңбеккерлігіне сүйсінесің. Оннан астам шәкірті облыстық, республикалық байқаулардың лауреаты атанды.
Кейіпкеріміз Ақсу ауданында 1989 жылы 20 желтоқсанда дүниеге келген. Әнге деген құмарлық бала жастан басталады. Бұл тұрғыда нағашыларына тартқан. Жүрімбек Сыдықов атындағы орта мектепте оқып жүріп-ақ талай ән байқауларына қатысып, жүлделі орындар алды. Орта мектептен кейін Темірбек Жүргенов атындағы Өнер академиясына театртану бағыты бойынша грантқа оқуға түскенімен әнге деген ғашықтық, махаббат жеңіп, ол оқуынан бас тартып, музыка мамандығын таңдады. Лаки Кесоглу мен Толқын Забирова бағыт беріп, дауысының эстрада емес, классика екенін анықтап, жөн сілтегеннен кейінгі өмір жолы өзге арнаға бұрылды. Талдықорғандағы Күләш Байсейітова атындағы колледж бен Алматыдағы Құрманғазы атындағы Қазақ ұлттық консерваториясынан білім алған Ілиястың сазгерлік қыры да бар. Өзінің айтуынша, жиі ән жазатындардың қатарынан емес. Алғашқы әні анасы дүниеден өткен кезде шыққан. Шабытпен сазы келді, артынша анасының құрбысы Мадина Жұмкеева сөзін жазып берді. Содан да болар, ол әнді шәкірттері кезек-кезек орындап, байқауларға қосып, жүлделі болып жүргендігі.
Бүгінде ән қоржынында онға жуық өз туындысы бар. Кеуде тұсында орналасқан бір уыс еттің әнге әуестігі отадан кейін де жалғаса берді. Жыл сайын дәрігерлік тексерістен өту міндеті қойылғанымен, шәкірттерінің жетістігі жүрек шіркінге шабыт беріп, уақыт тапшылығынан ұмытып кететінін де жасырмайды кейіпкеріміз.
Бүгінде алыс-жақын ауылдардан жас ұстаз Ілиясты іздеп келіп, тобына жазылатындар бар. Бұл білімділіктен, ізденімпаздықтан шығар деп білеміз. Асқан асуы біршама жас ұстаздың бағындырары да мол.
Серік ҚАНТАЙ
