Бүгінде қасиетті Қаратал ауданы еңбекшіл елдің арқасында ырысы еселенген өңірге айналды. Күріш өсіруден ең солтүстік аймақ атанып, ақ күрішін ақ күмістей сапырған дала бүгінде балтамырды да баптап егуге ден қойған. Соның арқасында биылғы жылы аймақтағы тәтті түбір алаңы өткен жыл еншісіндегі 560 гектардан 940 гектарға дейін артып, Елбасы тапсырмасының, өңір басшысы бастамасының аудандарда тыңғылықты орындалып жатқанының айқын көрінісіне айналды. Осы ретте аудан әкімі Қайрат Бисембаевпен бірге әулиелер мекеніндегі егістік алқаптарының бүгінгі жай-күйімен танысып қайттық.
Ерте көктемде түрен тісі тиген әрбір егістік алқабы көк желегін көзге тартады. Көз ұшы көк теңіз. Түрен тісі дегеннен шығады, аудан әкімі Қайрат Бисембаевтың айтуынша, өңірде 1990 жылдан бері балтамырды еккенге, жинағанға, күтіп-баптағанға бір де бір техника жаңармай келіпті. Сондықтан да осы олқылықтың орнын толтыру мақсатында өткен жылы өңір әкімі Амандық Баталовтың тікелей қолдауымен ауданда «Алға» сервистік дайындау орталығы құрылып, «Жетісу» әлеуметтік кәсіпкерлік корпорациясы арқылы 107 миллион теңгеге 25 бірлік техника сатып алыныпты. Осы техниканың арқасында бұл жылы егістік алқабындағы маусымдық, айлық шаралар өз деңгейінде тыңғылықты жүріп жатыр. Бұған қоса биыл аймақта облыс әкімінің қолдауымен тағы да 2 сервистік дайындау орталығы ашылмақ.
Біз ат басын тіреген Жолбарыс ауылдық округі кезінде қызылшаның отаны болыпты. Ол уақытта елді мекеннің аты 2000 гектарға дейін тәтті тамыр егумен шыққан. Қазірде бұл бағыттағы құлшыныс көңіл көншітуде. Бір округтің өзі биылдыққа 600 гектардан аса аумақта қызылша өсіріп отыр. Түсім жағынан да бұл округ қызылшамен айналысатын басқа елді мекендердің алдында. Мұны бізге осындағы “Молжігітов» шаруа қожалығының егінжайымен танысу барысында аудан әкімі баян етті.
– Қаратал ауданы құмды жерлермен көп шектесетіндіктен топырағы құмсағыздау, көбіне-көп тез шөлдеп, суды көп қажет ететін аймақтардың бірі. Осы себепті де бізде көп жағдайда егістік алқаптарында өнім жинау көрсеткішінде әртүрлілік орын алып жатады. Бұл жылы біз тәтті түбірді дендетіп өсіретін негізгі 8 округті белгілеп, осы бағытта нақты жоспарлар түздік. Соның арқасында биыл біз өткен жылғы өнім көрсеткішін (гектарына 300 центнер) айтарлықтай еселей түсеміз деп үміттенеміз. Бұлай ауыз толтырып айтуымызға өздеріңіз көріп отырған мына төл өніміміз негіз болады, – деп бір-екі түп тәтті тамырды жұлып алып көрсетті.
Қызылша аралығының тығыздығын, желегімен киіздей тұтасып жатқанын байқап, оның жайын сұрағанымызда “Молжігітов” шаруа қожалығының басшысы Исатай Төлеубекұлы мұны жаңа технологияның жетістігі деп түсіндірді. Бұрындары тұқым сепкенде қатар арасы 60 сантиметрлік өлшеммен егіліп келсе, қазір бұл цифр 50 сантиметрге өзгеріпті. Соның нәтижесінде, біріншіден, себілген тұқым қатарының жиілігі артып, өнім көбірек алынса, екіншіден, бұл қазу жұмыстарында жаңа техникаларға да қиындық тудырмайды. Осы тәсілдің арқасында тәтті түбір қатарлары арасындағы бостық азайып, егін түбіне көлеңке көптеп түседі. Соның есебінен топырақтағы ылғал көбірек сақталуда.
Егіннің жауы арамшөп екені айтпасақ та белгілі. Әдетте топырақ қабатында 30 см. тереңдікте жатып та ұзақ мерзімге шірімей, жерге соқа тиісімен дүр ете қалатыны да рас. Алайда мұнда арамшөптің қылпы да білінбейді. Бұған қарап төккен тер мен еселеп еткен еңбектің табын байқағандай болдық. Осы ретте аудан әкімі де бұл ойымызды құптап, мұндағы жұрттың қант қызылшасына шындап көңіл бөле бастағанын айтты.
Қаратал ауданы.
Қозыбай құрман.
