Өткен бейсенбіде Қорғаста «Нұр жолы» жаңа шекаралық транспорттық өткелін іске қосудың халықаралық салтанаты өткізілді. Бұл Елбасы Нұрсұлтан Назарбаевтың бастамасымен қолға алынған мемлекеттік «Нұрлы жол» бағдарламасы аясында «Батыс Еуропа – Батыс Қытай» ауқымды жобасының нәтижелі аяқталуын айқындайтын тарихи оқиға.
Аталған бағдарлама Қытай Халық Республикасының басшысы Си Цзиньпиннің «Бір белдеу, бір жол» жобасымен сабақтасып, Ұлы Жібек жолын қазіргі заманға сай қайта құруға бағытталған. Мемлекеттік-жекеменшік әріптестік аясында жүзеге асқан жоба жөнінде 2017 жылғы 26 желтоқсанда «Евротранзит-Терминал» ЖШС мен ҚР Үкіметі арасында келісімшарт жасалған. Құрылысқа 69,7 миллиард теңге жұмсау көзделген.
«Нұр жолы» транспорт өткелінің көлемі 25,59 гектар және оның жанындағы транспорттық-логистикалық орталық аумағы 23,58 гектарды қамтиды. Бұл дүниежүзіндегі ең ірілер қатарындағы, ал Орта Азия мемлекеттері арасындағы теңдесі жоқ үлкен кедендік өткел болып табылады. Кеденнің 8 бақылау-өткізу жолақтары арқылы күн сайын жалпы 2500 автотранспортты ары-бері өткізу мүмкіндігі бар. Олардың 2200-і жүк көлігі, 300-і жолаушылар мінген автобустар және жеңіл автомашиналар болмақ.
Жаңа кедендік автотранспорттық өткелдің ашылу салтанатына дүниежүзілік кеден департаменттерінің өкілдері, Әзірбайжан, Грузия, Өзбекстан үкіметтерінің қызметкерлері, Еуразия экономикалық одағы елдері кеден басшыларының орынбасарлары, ҚР Қаржы министрінің орынбасары Қанат Байәділов, еліміздің ірі сауда, кәсіпорын жетекшілері, облыс әкімі Амандық Баталов бастаған аймақтың мемлекеттік қызмет басшылары, ҚХР тарапынан СУАР Үкіметінің Төрағасы Закир Шехрат бастаған құзыретті органдар мен сауда компанияларының жауапты тұлғалары қатысты.
Салтанатты жиын алдында шетелдерден келген қонақтар «Қорғас шекара маңы халықаралық ынтымақтастық орталығына» саяхатқа шақырылып, ондағы жаңалықтар таныстырылды. Орталықтағы сауда айналымы жақында цифрлық жүйеге көшіріліп, Қазақстан тарабындағы сауда орындарына 39 терминал қойылып, орталыққа кіріп-шығатын 8 бақылау өткеліне келушілерге RFID-карталарын тарататын қондырғылар орнатылған. Бұл орталық кеденінен өтетін барлық тауар түрлерін цифрлық жүйемен есепке алуға және бақылауға жеңілдік жасап отыр. Бұдан тыс орталықтағы тауар мен жеке тұлғаларды тасымалдауға «КТЗ» ЖШС-нің 15 шағын жүк көлігі мен әрқайсысы 30 орынды 26 жолаушылар тасымалдайтын автобус қызмет етуде. Сонымен бірге қонақтарға орталықтың қазақстандық бөлігіндегі жаңа құрылыс алаңдары, сауда орындарының қызметі көрсетілді.
Шетелдік қонақтар қысқа саяхаттан кейін «Нұр жолы» бекетіне келіп, екі ел шекараларының аралығындағы арнайы жасалған алаңдағы салтанатқа қатысты. Халықаралық деңгейдегі салтанатты жиында алдымен Алматы облысының әкімі Амандық Баталов сөз сөйлеп, жиналған қауымды жаңа автотранспорт бекетінің ашылу қуанышымен құттықтады.
– Бүгін біз тарихи сәттің – мемлекеттік-жекеменшік әріптестік аясында салынған «Нұр жолы» жүк-жолаушылар өткізу пунктінің ашылуына куә болып отырмыз, – деп сөз бастаған облыс басшысы Қазақстан және ҚХР мемлекеттері басшыларының бастамасымен жүзеге асқан «Батыс Еуропа – Батыс Қытай» жобасының дүниежүзілік сауданың дамуына және мемлекет аралық интеграцияның өркен жаюына тигізген орасан зор ықпалын жіліктеп айтып шықты. Осынау ірі жобаның жүзеге асуы Алматы облысының тұрғындарына да көптеген игіліктер беруде. «Қорғас – Шығыс қақпасы» арнайы экономикалық аймағы іске қосылғаннан бері Алтынкөл теміржол бекеті арқылы өтетін жолаушылар саны мен жүкайналымы облыста 1,5 есе, транспорттық қызмет 4 есе артты. Облыс әкімі бұл көрсеткіштердің аймақтың қаржы қорына қомақты табыстар әкелгенін цифрлармен сараптап өтті.
Салтанатты жиында СУАР Үкіметінің басшысы Закир Шехрат, ҚР вице-министрі Қанат Байәділов, кедендік байланыс бойынша Еуразия қауымдастығы комиссиясының мүшесі Мұқай Қадырқұлов баршаны тарихи оқиғамен құттықтап сөз сөйледі. Жиыннан соң екі елдің алғашқы жүк көліктері қарама-қарсы бағытта жолға шықты.
Мырзағали Нұрсейіт
Панфилов ауданы
