Жетісу облысының орталығындағы Тіл сарайында қалалық қоғамдық кеңестің қорытынды жиыны өтті.
Талдықорған қаласының әкімі Ернат Бәзілдің қатысуымен өткен басқосуда сөз алған кеңес төрағасы Жексембай Мейрембаев үш жылдан бері атқарылған жұмыстар жайына кеңінен тоқталып, халықтың мүддесі үшін қызмет еткен кеңес мүшелеріне айрықша алғысын жеткізді.
Кеңес басшысының сөзінше, ҚР «Қоғамдық кеңестер туралы» Заңында атап көрсетілген кеңес қызметінің басты мақсаты – әлеуметтік маңызы бар мәселелер бойынша азаматтық қоғамның пікірін білдіру. Осыған сай бүгінгі күнге дейін аймақта ашықтықты қамтамасыз етіп, жергілікті мемлекеттік және өзін-өзі басқару органдарының іс-қимылын дамыту бағытында қыруар жұмыстар атқарылған. Мәселен, өткен бір жылда қалалық кеңестің ұйымдастыруында 70-тен астам жиын өткізіліп, онда қоғамдық бақылау мен ашықтықты қамтамасыз етуде қаралған бірқатар мәселелер оң шешімін тапқан.
– Қазіргі кезде кез келген атқарушы билік сатысы жанында қоғамдық кеңес құрылымы бар. Бұл құрылымдардың құзыретінде халық пен билік арасында алтын көпір болу миссиясы жүктелген. Сіздер қоғамның дамуы мен өңірдің өркендеуіне өз үлестеріңізді қосып, мемлекет алдындағы міндеттеріңізді адал әрі жорғары біліктілікпен атқардыңыздар. Мұндай жұмыстар бұдан былай да жүйелі түрде жүргізіле береді деп сенемін,– деді шаһар басшысы Ернат Дүйсенбекұлы.
Осыдан соң қала әкімі кеңестің бірқатар мүшелеріне арнайы Алғыс хат пен Құрмет грамоталарын табыстады.
Айдын КӘЛІМХАН
