Жеңіс күні қарсаңында облыс әкімі Бейбіт ИСАБАЕВ, Қорғаныс министрі Руслан ЖАҚСЫЛЫҚОВ, қазақтан шыққан тұңғыш ғарышкер Тоқтар ӘУБӘКІРОВ, ғарышкер Айдын АЙЫМБЕТОВ Талдықорғанда тұратын Ұлы Отан соғысының үш ардагерінің үйіне барып, Мемлекет басшысының Алғыс хатын табыстап, жылы лебіздерін білдірді.
Қонақтар бірінші болып соғыс ардагері Ысқақ Құсайыновтың үйіне барды. Майдангер 1924 жылы 14 қаңтарда Алакөл ауданы Көлбай ауылында дүниеге келген. 18 жасында өзі сұранып майдан даласына аттанған Ысқақ Әбілпейісұлы 1942 жылы Украина майданында атқыш пулеметші болады. 1943 жылы Тынық мұхитындағы Амур әскери-теңіз флотына атқыштар дивизиясына жіберіледі. Сол жерде кемеде камандор міндетін атқарады. 1945 жылы Жапон Совет соғысында кемеде зенитчик болып жүрген кезінде жаудың бір самолетын атып құлатқан. Сол үшін 1946 жылы «Сынь Казакстана» деген атпен мергендігімен көзге түскен ардагер жайлы мақала шығыпты. Бүгінде Чита қаласындағы Тынық мұхиты Амур әскери-теңіз флоты мұражайында Ысқақ Әбілпейісұлының жанұясымен түскен суреттері және ерлік істері туралы жазылған мақалалары орналасқан. Еңбек Қызыл Ту, II дәрежелі Отан соғысы ордендерін кеудесіне таққан майдангер соғыстан кейін ауылы алтын бесігін өркендету үшін білім беру саласында жемісті еңбек істеген.
Осыдан кейін аймақ басшысы зұлмат соғыстың зардабын көрген Сəрсенбай Қаңтарбайдың шаңырағына барды. Ардагер өзінің соғыстағы жүріп өткен жолын айтып, болашақ жастарға ақ тілегін ақтарды. 1943-1944 жылдары Польша, Литва, Латвия, Эстонияны жаудан азат етуге қатысқан майдангер Екінші дүниежүзілік соғыста даңқты полковник Бауыржан Момышұлы басқарған 9-шы гвардиялық дивизия сапында болған. От пен оқтың, талай қантөгістің ортасында жүріп, ерлігімен көзге түскен қаһарман 1944 жылы қаңтар айының 22-күні Германияның Гумбиннен қаласында ауыр жараланады. 1945 жылы 24 маусым күні Мәскеу қаласындағы қызыл алаңда өткен Жеңіс парадына қатысып, II топтағы соғыс мүгедегі болып, елге оралады. Қан майданда ерен ерлігімен танылған батыр Отан соғысының I дəрежелі орденімен, «Отан соғысының ардагері», «Еңбек ардагер» медальдарымен марапатталған. Бүгінде ақсақал 9 баладан 25 немере, 37 шөбере сүйіп отыр.
– Еліміздің болашағы білімді жастардың қолында. Ұлтымыздың абыройын асқақтатын ұрпақ көп болсын. Еліміз аман, жұртымыз тыныш, аспанымыз ашық болсын. Соғыс болмасын. Елімізде мәңгілік бейбітшілік орнасын, – деп соғыс ардагері ізгі тілегін білдірді.
Қонақтар Жеңіс күнімен Төлеубай Шектібаевты да құттықтады. Шара барысында соғыс ардагері соғыс жылдарындағы оқиғаларын айтып, өскелең ұрпаққа ақ батасын берді. Майданға 18 жасында аттанған сарбаз Мажарстандағы Балатон өзеніне дейін неміс басқыншыларынан азат ету ұрысына қатысқан. 1945 жылы 83-ші атқыштар дивизиясының құрамында жапон әскеріне қарсы соққы беріп, Харбин қаласын азат етушілер қатарныда болған. I дәрежелі Отан соғысы ордені және басқа да мерекелік медальдармен марапатталған. Бүгінде абыз ақсақал 7 баласынан 12 немере, 11 шөбере сүйіп отыр.
Осыдан кейін ардагерлер аймақ басшысымен бірге Мәңгілік алауы сөнбейтін Даңқ обелискісіне барып, гүл шоқтарын қою рәсіміне қатысты.
Айдар ҚАЛИЕВ
Суретті түсірген Жеңіс Ысқабай
