Алматы мен Жамбыл облыстары шектесетін Қызылтаң разъезінде ел өміріндегі маңызы зор оқиға болды. «Алматы-1 – Шу» учаскесінің екінші теміржолы құрылысы» нысанының дәл осы нүктесінде «Ақтөбе рельс арқауы зауыты» ЖШС-дан шыққан тұңғыш отандық өнім – алғашқы рельс төселді. Оған «Қазақстан темір жолы» ұлттық компаниясы» АҚ президенті Асқар Мамин мен облыс әкімі Амандық БАТАЛОВ қатысып, теміржолшыларды құттықтап, жұмысшылардың ісіне сәттілік тіледі.
Бұл жоба «Нұрлы Жол» жаңа экономикалық саясаты мен «Үдемелі-индустриялық-инновациялық даму» мемлекеттік бағдарламасының табысы. «Қазақстан теміржолы» ҰК» акционерлік қоғамының президенті Асқар Мәмин зауыт өнімінің Қазақстан экономикасы үшін стратегиялық маңызды рөл атқаратынын және отандық өндіріске бағытталған кәсіпорынның экспорттық әлеуеті зор екендігін атап өтті. «Ендігі жерде қажетті рельстер отандық өнім өндірушілерден алынатын болады», – деді ол. Арқаулы рельстер алдын ала дайындалған жерге алып кранмен қойылғаннан кейін облыс басшысы мен аталған Ұлттық компания жетекшісі су жаңа шойынжол бөліктерінің бір-бірімен түйісер тұстарының алғашқы бұрандасын өз қолдарымен бекітті.
«Алматы-1 – Шу» теміржол телімінде 110 шақырымдық магистральдік желі және 10 шақырымдай стационарлық жол салынады. Қазірдің өзінде белгі беру және байланыс, электр желілері, 16 көпір мен 80 суөткел құбырының құрылысы жүргізіліп жатыр. Жобаның бірінші кезегін биылғы жылы пайдалануға беру жоспарлануда. Аталған жоба жүзеге асқанда 1500 жұмыс орны ашылады. Бұл жобаның біздің аймақ үшін әлеуметтік-экономикалық маңызы зор.
Ақтөбедегі рельс зауытының директоры Андрей Кузьмин тілшілерге берген сұхбатында бұл зауыттың Елбасының тапсырмасы бойынша салынғанын және ТМД елдерінде теңдесі жоқ өндіріс орны екенін жеткізді. Оның айтуынша, бұған дейін елдегі шойынжол құрылысына шетелдік өнім пайдаланылып келсе, жобалық қуаттылығы бойынша жылына 200 мың тонна рельс шығаратын Қазақстандағы тұңғыш зауыттың арқасында магистральдік теміржол желілерін жаңғырту, жаңа желілер салуда отандық өнім қолданылатын болады.
Халықаралық талаптарға сәйкес сапасы жоғары, жарамдылық мерзімі ұзақ отандық өнімді кеңінен қолдану жолаушы тасымалында жылдам жүретін жаңа бағыттар ашуға мүмкіндік береді. Алматы мен Шудың арасында төселетін жаңа теміржол желісі іске қосылған кезде учаскенің өткізу қабілеті екі есеге артады. Жүк пойыздарының жылдамдығы артып, бағдардағы жүру мерзімі қысқарып, қуат ресурсы үнемделмек. Яғни, қарсы бағыттағы составты өткізіп жіберу үшін разъезде кідіру деген болмайды. Экономиканың күретамыры саналатын теміржол саласындағы жарқын жоба Қазақстанның транзиттік әлеуетінің өсуіне оң ықпал етеді.
Серік Сатыбалдиев
Жамбыл ауданы.
