Мемлекет басшысы Қасым-Жомарт Тоқаев Екінші дүниежүзілік соғыстағы және жапон басқыншылығына қарсы күрестегі Жеңістің 80 жылдығына орай Бейжіңдегі Тяньаньмэнь алаңында өткен әскери парадты тамашалады.
Президент Қытай Халық Республикасы Төрағасы Си Цзиньпинмен бірге мінберде Еуропа, Азия, Африка, Латын Америкасы елдерінен келген жиырмадан астам мемлекет пен үкімет басшыларымен қатар тұрды.
Шараға Қытай халық азаттық армиясының 45 әскери құрылымынан құралған 10 мыңнан астам жауынгер қатысты.
Салтанатты шеруде құрлықта, теңізде және әуеде қолданылатын стратегиялық қару-жарақ түрлері алғаш рет таныстырылды. Бұдан бөлек, 4-ші буын қаруының жаңа үлгілері, ұшқышсыз ұшу аппараттары мен оларға қарсы қорғаныс жүйелері, бағытталған энергия қаруы және басқа да заманауи әскери техника көрсетілді.
