Бұл туралы Мемлекет басшысы Қасым-Жомарт Тоқаев Ақордада энергетика саласы қызметкерлерін кәсіби мерекесімен құттықтау барысында айтты, – деп хабарлайды 7-su.kz ақпараттық порталы.
Президент Қазақстанның тұрақты дамып келе жатқанына назар аударып, экономиканы және инфрақұрылымды дамытуға басымдық беріліп отырғанын атап өтті.
– Біз заманауи өндіріс орындарын ашып жатырмыз. Ел жаппай цифрландыру және жасанды интеллект дәуіріне қадам басты. Қазақстан болашақта толыққанды цифрлық елге айналуға тиіс. Осы мақсатта ауқымды жұмыс қолға алынды. Астанада Халықаралық жасанды интеллект орталығы құрылды. Жақында америкалық компания технологиясы негізінде жасалған суперкомпьютер іске қосылды. Алдағы уақытта жаңа дата-орталықтар салынып, «бұлтты» инфрақұрылым қалыптасады. Әрине, мұның барлығы энергетика саласына үлкен жүктеме түсіреді. Сондықтан бұл бағытты түбегейлі жаңғыртуымыз қажет, – деді Қасым-Жомарт Тоқаев.
Сондай-ақ Мемлекет басшысы соңғы алты жылда электр энергиясын өндіру көлемі 16 миллиард киловатт-сағатқа артқанын айтты.
– Бұл көрсеткіш Қарағанды облысы секілді өндірісі дамыған өңірдің бір жылдық тұтыну көлеміне тең. Қазіргі таңда еліміздің электр энергетикасы жүйесіне жалпы қуаты 25 гигаваттан асатын 237 электр станциясы кіреді. Ал іс жүзінде қолданыстағы қуат көлемі – 21 гигаватт. Мемлекет жүргізіп отырған жүйелі шаралардың арқасында энергия нысандары мен инженерлік-коммуналдық желілердің орнықтылығы айтарлықтай артты. Өткен жылы жылыту маусымында технологиялық ақаулар саны 27 пайызға қысқарды. Тоғыз жылу электр орталығы тәуекелдің «қызыл» аймағынан шықса, үш станция «жасыл» аймаққа өтті, – деді Президент.
