Мемлекет басшысы Еуразиялық экономикалық одақтың (ЕАЭО) экономикалық әлеуетін одан әрі нығайту қажеттігіне назар аударып, интеграциялық бірлестікті дамытудың басым бағыттарын айқындады.
Президенттің айтуынша, әлем жаппай цифрлық трансформация мен жасанды интеллект дәуіріне қадам басты. Осыған байланысты заманауи технологияларды ЕАЭО-ға мүше елдердің экономикасының барлық саласына енгізу маңызды.
– Уақыт ағымынан қалмай, жаңа технологияларды кеңінен қолдану қажет деп санаймын. Осы ретте жасанды интеллект технологиясын ЕАЭО қызметіне кезең-кезеңімен енгізуді ұсынамыз. Мұндай жүйелерді сауда ағындарын жоспарлау мен кедендік баж салығының ықпалын бағалау үшін қазірдің өзінде пайдалануға болады, – деді Мемлекет басшысы.
Сондай-ақ Президент келесі жылы Қазақстанның ЕАЭО-ға төрағалығы аясында дәстүрлі Еуразия экономикалық форум өтетінін атап өтті. Оның айтуынша, аталған алаңда Экономикалық одақ кеңістігінде жасанды интеллектіні жауапкершілікпен пайдалану жөнінде бірлескен мәлімдеме қабылдауға мүмкіндік бар.
