Мемлекет басшысы Қасым-Жомарт Тоқаевтың Жапонияға ресми сапары аясында жалпы құны 3,7 миллиард АҚШ долларынан асатын коммерциялық келісімдерге қол қою жоспарланып отыр.
Бұл туралы ҚР Президентінің көмекшісі – Баспасөз хатшысы Руслан Желдібай мәлімдеді, – деп хабарлайды 7-su.kz ақпараттық порталы.
Сапар барысында Президент Токио қаласында Жапонияның ірі бизнес өкілдерімен бірқатар кездесулер өткізеді. Жалпы алғанда, 40-тан астам екіжақты құжатқа қол қойылады деп күтілуде.
Келісімдер энергетика, жаңартылатын энергия көздері, цифрландыру, тау-кен өнеркәсібі және көлік салаларын қамтиды.
Қазақстан тарапынан құжаттарға «Самұрық-Қазына» ұлттық әл-ауқат қоры, KEGOC, «Қазатомөнеркәсіп», «Тау-кен Самұрық», «Қазпошта», «Қазақстан темір жолы» ұлттық компанияларының өкілдері қол қояды.
Ал жапон тарапынан Marubeni, MUFG Bank, Mitsubishi Heavy Industries, Hitachi Energy, Toshiba, JOGMEC, Kansai Electric Power және RIKEN KOGYO компанияларының қатысуы жоспарланған.
Сонымен қатар, Президенттің Жапонияға сапары аясында ресми келіссөздер мен іскерлік кездесулер өткізу көзделіп отыр.
