Бүгін Астана қаласында өткен ауыл әкімдерінің диалог-платформасында Мемлекет басшысы Қасым-Жомарт Тоқаев ауылдарды дамыту – ел үшін стратегиялық маңызы бар басты міндеттердің бірі екенін айтты. Президент өз сөзінде ауыл – қазақтың төл өркениетінің алтын қазығы екенін атап өтті.
«Ауыл – төл өркениетіміздің алтын қазығы. Ауылды өркендету – баршаға ортақ парыз. Мемлекет бұл мәселеге ерекше жауапкершілікпен қарайды. 2022 жылы халыққа ұсынған сайлауалды бағдарламада ауыл мәселесіне айрықша назар аудардым. Алғашқы Жарлығым да ауылды дамытуға арналды», – деді Мемлекет басшысы.
Осы Жарлыққа сәйкес Қазақстан Республикасының ауылдық аумақтарын дамытудың 2023-2027 жылдарға арналған тұжырымдамасы әзірленіп, қазіргі таңда құжат аясында нақты жұмыстар жүзеге асырылып жатыр.
Президенттің айтуынша, жуырда ғана Ауыл еңбеккерлерінің екінші форумы өтіп, онда осы саладағы өзекті мәселелер жан-жақты қаралған. Ал бүгінгі жиында ауыл-аймақтардың алдағы даму бағыты айқындалмақ. Бұл — мемлекет алдында тұрған аса маңызды стратегиялық міндеттердің бірі.
Ауылдағы нақты өзгерістер
Мемлекет басшысы ауыл тұрғындарының тұрмыс сапасын жақсартуға бағытталған жұмыстың жүйелі түрде жүргізіліп жатқанын атап өтті. Атап айтқанда:
-
2022 жылы халық табысын арттыруға арналған кешенді жоспар қабылданды;
-
2024 жылы алдағы 5 жылға арналған Өңірлерді дамыту тұжырымдамасы бекітілді;
-
2021 жылдан бері ауылдық жерлерде 864 медициналық-санитарлық көмек көрсету нысаны салынды;
-
388 жаңа мектеп пайдалануға берілді;
-
2 мыңға жуық ауыл мектебіне сапалы интернет желісі тартылды.
Сонымен қатар ауыл шаруашылығы саласында да айтарлықтай өсім байқалып отыр. Соңғы 6 жылда ауыл шаруашылығының жалпы өнімі 1,5 еседен астам артып, 8,3 триллион теңгеге жеткен.
Биыл ауыл шаруашылығымен айналысатын азаматтарға 1 триллион теңге көлемінде мемлекеттік қолдау көрсетілген. Президенттің айтуынша, бұл – көп ел қол жеткізе бермейтін ауқымды қаржылай көмек.
Алда тұрған міндеттер
Дегенмен, Мемлекет басшысы қол жеткізілген нәтижелермен тоқтап қалмай, ауылды дамыту бағытындағы жұмысты одан әрі күшейту қажет екенін айтты.
«Алдымызда биік мақсаттар тұр: біз ауылдағы жағдайды жақсартып, жұмысты күшейтуіміз керек», – деді Қасым-Жомарт Тоқаев.
Айта кетейік, бүгінде Қазақстанда 2334 ауыл әкімі сайланған. Диалог-платформаға олардың 80 пайызы қатысып, ел тарихында алғаш рет осындай ауқымдағы ауыл басшыларының басқосуы өтті. Бұл жиын ауыл мен қала арасындағы байланысты нығайтып, ауылдардың әлеуетін арттыруға бағытталған нақты қадам болмақ.
