Президент Қасым-Жомарт Тоқаев ОПЕК бас хатшысы Хайтам әл-Гаисты қабылдады, – деп хабарлайды 7-su.kz ақпараттық порталы.
Кездесуде әлемдік мұнай нарығының қазіргі жағдайы мен өзара іс-қимылдың өзекті мәселелері қаралды. Мемлекет басшысы ОПЕК-тің жаһандық мұнай нарығының тұрақтылығын қамтамасыз етуге бағытталған күш-жігерін жоғары бағалап, Хайтам әл-Гаистың сапарын Қазақстан мен ұйым арасындағы конструктивті диалогты дамытудың маңызды қадамы ретінде атап өтті.
Президенттің айтуынша, Қазақстан ұлттық мүддені қорғауға басымдық бере отырып, мұнай өндіру көлемін біртіндеп ұлғайту жөніндегі ОПЕК+ шешімін қолдайды.
Әңгіме барысында өңірлік энергетикалық жүйенің орнықтылығын нығайтуға бағытталған бірлескен шаралар және мұнай өндіруші елдер мен көмірсутегін импорттаушы мемлекеттердің мүдделер теңгерімін сақтау мәселелері талқыланды.
