Еңбек және халықты әлеуметтік қорғау министрлігі Қазақстандағы жұмыссыздыққа қатысты өзекті деректерді ұсынды.
Ведомство мәліметінше, 2025 жылғы 1 желтоқсандағы жағдай бойынша Мемлекеттік әлеуметтік сақтандыру қорынан (МӘСҚ) жұмысынан айырылуына байланысты әлеуметтік төлем алып отырған азаматтар саны 331,7 мың адамды құрады. Оның ішінде 289,8 мың адамға төлем биыл алғаш рет тағайындалған.
Жұмысынан айырылуына байланысты төлемдердің жалпы сомасы 118,5 миллиард теңге болды.
Төлем қалай тағайындалады?
Қолданыстағы заңнамаға сәйкес, жұмыстан босатылған азаматтар міндетті әлеуметтік сақтандыру жүйесіне қатысу өтіліне және соңғы 24 айдағы табысына байланысты 1 айдан 6 айға дейін жұмысынан айырылуы бойынша әлеуметтік төлем алады. Төлем мөлшері жоғалған кірістің 45 пайызына дейін және МӘСҚ қаражаты есебінен жүзеге асырылады.
Әлеуметтік төлем тағайындату үшін азаматтар eGov.kz порталы арқылы келесі қадамдарды орындауы қажет:
- eGov.kz порталында авторизациядан өту;
- «Жұмысқа орналастыру және жұмыспен қамту» бөлімінен «Жұмыс іздеуші адамдарды тіркеу» қызметін таңдау;
- онлайн өтінімді толтырып, оны ЭЦҚ-мен растау;
- өтінім жіберілгеннен кейін бір жұмыс күні ішінде тұрғылықты жері бойынша мансап орталығы бос жұмыс орындарын ұсынады;
- егер жұмыс табылмаса, үш жұмыс күні ішінде қашықтан жұмыссыз мәртебесі беріледі.
Бұл қызметті enbek.kz Электрондық еңбек биржасы арқылы онлайн форматта да алуға болады.
Жұмыссыз ретінде тіркелу туралы деректер болған жағдайда, Еңбек министрлігінің ақпараттық жүйесі проактивті форматта МӘСҚ-тан төлем тағайындауға келісім алу үшін азаматтың мобильді телефонына SMS-хабарлама жолдайды. Келісім берілген жағдайда төлем автоматты түрде тағайындалады.
