Жетісудың ақындары Айтақын Бұлғақов пен Төлеужан Ғұмаровтың Алматы облысы әкімінің қолдауымен жарыққа шыққан кітаптарының тұсаукесері өтті. Шараға облыстық мәдениет, архивтер және құжаттама басқармасының басшысы Мәрлен Көлбаев, мекеме басшылары, бірқатар аудан, қала әкімдерінің орынбасарлары және Жетісу ақын-жазушылары қатысты.
Қос ақын да облыс руханиятының өркендеуіне өзіндік үлесін қосып келе жатқан азаматтар. Айтақын Бұлғақов 1960 жылы Панфилов ауданының Үшарал ауылында дүниеге келген. Ол Үшарал ауылының халық театрының құрамында өнер көрсетіп, аудандық мәдениет бөлімінде автоклуб меңгерушісі қызметтерін атқарды. Талдықорған облыстық «Қазақ тілі қоғамында» белсенді жұмыс атқарып, облыстық тіл басқармасында жетекші маман болған, рухани салаға барынша еңбек сіңіріп келе жатқан Айтақын Мұхамадиұлы облыстық телерадио комитетінде тілшілік қызмет атқарды.
2008 жылдан бері «Алатау» қоғамдық-саяси газетінде бас редактор қызметін атқарып келе жатқан Айтекеңді күллі қазақ жұрты біледі. Оның шашасына шаң жұқпас айтыс ақыны екенін айтыссүйер қауым мойындаған. Өзіне тән әуенін айтсаңшы! «Хайләйлімі» тек өзіне ғана жарасады.
Ақын шабыты келгенде отырған жұрт қыран-топан күлкіге қарық болады. Уытты сөзі, ұтымды ұйқасы бұлақша ағылады-ау! Нағыз дарын!
Жыр жампозының ел көлемінде жеткен жетістігі де жетерлік. Айтекең Қазақ радиосы ұйымдастырған «Әуе толқыны» айтысында жеңімпаз атанып, аңырақай шайқасының 270 жылдығына арналған республикалық айтыста І орынды иеленді.
Айтақын актерлік қырымен де танылған жан. Оның «Қозы Көрпеш – Баян сұлу» фильмінде бақсы рөлін сәтті сомдағанын барша жұрт біледі. Ол қазақтың ұлы тұлғасы Мұхаметжан Тынышбаевтың тарихи мұрасын зерттеуге үлес қосқаны үшін «Мұхаметжан Тынышбаевтың туғанына 130 жыл» медалін, Монғолия демократиялық партиясының «Монғолия тәуелсіздігінің құқығын қорғаудағы ісіне қосқан үлесі үшін» марапатын иеленген. Бірнеше республикалық, халықаралық айтыстардың жеңімпазы. Бұл күні Айтақын Бұлғақовқа «Панфилов ауданының Құрметті азаматы» атағы берілді.
Осы күні кітабы шыққан Төлеужан Ғұмаров мәдениет саласының білгір маманы. Тоқсаныншы жылғы тоқырауда да жылы жер іздеп кетпей Талдықорғанда қалып, ел мәдениетінің тұралап қалмауына үлес қосты.
Төлеужан Нүсіпжанұлы студент кезінен облыстық, республикалық айтыстарға қатысып, ойлы сөз, орамды ұйқасымен көпке танылды. Кейіннен республикалық, халықаралық айтыстарда маңдайы жарқырап, топты жарды. Төлеужанның «Алға, жасұлан» ән жинағы, 2010 жылы «Сөнбес сәуле» жыр жинағы, 2015 жылы «Ұрпақ үні» жыр жинағы мен мөлтек әңгімелері жарық көрді. Ол «Елім менің» республикалық композиторлар байқауының екі мәрте лауреаты. «Қазақстан Республикасы Мәдениет қайраткері» атағының иегері. 2013 жылдан бастап облыстық мәдениет, архивтер және құжаттама басқармасының бөлім басшысы қызметін атқарып келеді.
Төлеужан замандас елу деген ердің жасына абыроймен жетті. Елге сіңірген еңбегі, руханияттың өркендеуіне қосқан үлесі еленіп, осы күні «Ақсу ауданының Құрметті азаматы» атағын алды.
Қос азаматқа да атақтарыңыз құтты болсын, шабыттарыңыз шалқысын дейміз.
Гүлжан ТҰРСЫН
