Жақында мәдениет, мұрағаттар және құжаттама басқармасында 2016 жылды қорытындылаған алқа өтті. Оған облыс әкімінің орынбасары Жақсылық Омар қатысты. Жиынға облыстық мекеме басшылары, әлеуметтік сала жөніндегі аудан, қала әкімдерінің орынбасарлары, тілдерді дамыту бөлімдерінің басшылары шақырылды.
Алғашқы сөзді облыстық мәдениет, мұрағат және құжаттама басқармасының басшысы Ақан Әбдуәлиев алып, 2016 жылы атқарылған жұмыстар мен 2017 жылға арналған жоспарлар барысында баяндама жасады.
Ақан Жылқышыбайұлы баяндамасын облыс көлемінде атқарылған елеулі шаралардан бастады. Өткен жыл еліміз үшін Тәуелсіздіктің 25 жылдығымен есте қалды. Бұл орайда жер-жерлерде егемендігімізді ұлықтаған игі істер көптеп өтті. Барлық мекеме ел шежіресінен ойып орын алар айтулы жылды атап өтуге атсалысты. Соның ішінде халықты жақсылыққа ұйытатын мәдениет саласы қызметкерлерінің атқарған шарасы ұшан-теңіз. Сондай-ақ, Жамбыл Жабаевтың 170 жылдық, Қуат Терібаевтың 125, Темірғали Рүстембековтің 110, Дәнеш Рақышевтің 90, Мұқағали Мақатаевтың 85, Сайын Мұратбековтің 80, Зылиха Тамшыбаеваның 80, Чернобль апатының 30 жылдықтары аясында кең көлемді, ауқымды шаралар ұйымдастырылғаны жұртшылыққа аян. Ақан Жылқышыбайұлы мәдениет саласы қызметкерлерінің ел көлемінде ұйымдастырылған шараларға белсене атсалысқанын ауыз толтыра айтты. Мысалы, өнерпаздар Астана қаласында өткен облыс күндерінде Конгресс холл залында үлкен концерт беріп, қолөнер шеберлері мен өңіріміздің экономикалық өсімі жөнінде көрме ұйымдастырған. Ел Тәуелсіздігінің 25 жылыдығына орай «ТҮРКІСОЙ» халықаралық ұйымының ұйымдастыруымен облысымызда түркітілдес елдердің халық аспаптар оркестрінің гала-концерті өтіп, Қырғыз, Башқұрт, Әзірбайжан, Моңғол, Өзбек елдерінің шығармашылығы паш етілді. «Алтынай» мемлекеттік халықтық би ансамблі Астана қаласында өткен «Шабыт» халықаралық байқауына қатысып, бас жүлдені иеленген. Сондай-ақ, желтоқсан айында облыс өнерпаздары Венгрия, Сербия елдеріне барып, ұлттық өнерді насихаттаған.
Жетістіктерді саралай келе басқарма басшысы мәдениет саласындағы өзекті мәселелерге де тоқталды. – Мәдениет үйлерінің 44 пайызына күрделі жөндеу жүргізу керек. Сондай-ақ, 17 ауылдық клуб мекемесі апаттық жағдайда. Осыларға жөндеу жүргізуге, жаңалауға қаржы бөлінсе деген ұсыныс айтылды. Басқарма басшысы Ұйғыр, Сарқан, Райымбек, Балқаш, Панфилов аудандары әкімдерінің орынбасарларына аудандағы мәдениет саласы бойынша орын алып отырған олқылықтарға орай сын айтты. Мысалы, Панфилов ауданының мұрағатында жұмысты ұйымдастыру төмен деңгейде. Аудандағы мекемелердің құжаттары мұрағатқа уақытында өткізілмейтіні ескертілді. Балқаш ауданының үш мәдениет ғимаратында паспорттың жоқтығы, кәсіподақ ұйымының жұмыс істемейтіні сөз болды. Сын-ескертпеге жауап берген аудан әкімдерінің орынбасарлары кемшіліктерді алдағы уақытта орнына келтіретінін айтты.
Жиын соңында биыл Дүниежүзілік универсиада, «ЭКСПО – 2017» халықаралық көрмесі, Алаш қозғалысының 100 жылдығы, ел тарихындағы танымал тұлғалардың мерейтойлары аталып өтілетіні де айтылды.
Гүлжан ТҰРСЫН
