Алматы қаласының төрт серіктес қалалары құрылысы инвестициялық жобасы бойынша атқарылып жатқан жұмыстардың жай-жапсарын білмекке ҚР Премьер-Министрінің бірінші орынбасары Асқар Мамин ресми сапармен Іле ауданына келді. Маңызды жоба жайлы басқосуға Алматы облысының әкімі Амандық Баталов пен Алматы қаласының әкімі Бауыржан Байбек қатысты.
Бүгінде бұл жоба еліміздің «Индустрияландыру картасының» 35-ші тармағы ретінде жүзеге асырылуда. Үкімет бұл жоба арқылы Қазақстанды Орталық Азияның халықаралық сауда орталығы ретінде дамытуға ықпал ету, елдегі жалпы экономикалық белсенділікті арттыру, туризмді өркендетумен қатар Алматы қаласының антропогендік қысымды төмендету, экологиялық тепе-теңдігін қолдау, технологиялық өнеркәсіптік кешен құру сияқты бірқатар мақсатты көздеген болатын. Естеріңізге сала кетейік: төрт серіктес қаланың біріншісі, өңірлік қаржы орталығы; екіншісі, мәдени, білім беру, ғылыми-медициналық; үшіншісі, өнеркәсіптік-логистикалық; төртіншісі, туристік бағытқа арналған.
2008 жылы қолға алынған аталмыш жобаға 2015 жылға дейін 31,38 млрд. теңге қаржы бөлініп игерілген. 2012 жылы Іле аудандық құрылыс бөлімі мемлекеттік мекемесі 14, 8 млрд. теңге, ал бас мердігер «Алатау» ААҚ компаниясы 16,5 млрд. теңге қаражатты жобаның инженерлік инфрақұрылым обьектілерін салуға жұмсаған. Атап айтсақ, «Қоянқұс» тұрғын ауданының инженерлік-коммуникациялық инфрақұрылымына, яғни, жолдар мен кәріз желілеріне, кәріздік сорғы стансысына, су жылыту қазандығы және «Қақпа-1» жаңа қосалқы стансысын салуға 624, 5 млн. теңге жұмсалған.
Сонымен қатар бірінші серіктес қаланың «Береке» индустриалды аймағының да жобасы таныстырылды. Жалпы көлемі 383,3 гектар жерді алып жатқан индустриалды кешенде электр қуаты, су, жолдар мен жылыту жүйесі жабдықталған. Бұл жерде бес өндіріс ошағы орналасқан. Бүгінгі күні «Эко Культура» ААҚ мен «Грин Хаус Қазақстан» ЖШС атты екі жылыжай кешені, ет өнімдерін өндіретін кешен «Бауман ГМБХ», фармацевтикалық зауыты «Парма» ЖШС және картоп өнімдерін өндіретін «Френч Фрайз» компаниясы жүйелі жұмыс істеп тұр.
Таныстырылымды қорытындылай келе, ҚР Премьер-Министрінің бірінші орынбасары Асқар Мамин:
– Мына мәселені нақты айтуға болады. 2017 жылы индустриялды-инновациялық жобаның жұмысы басталады. Инфрақұрылымы қазір дайын. Мұнда тұрғын үйлер мен өндірістік аймақтар салынады. Бұл жобаны жүйелі түрде қолға алуға мемлекетте қаржы жеткілікті. Ең бастысы, инвесторлармен белсенді жұмыс істеу керек. Қазіргі таңда 6 өндірістік аймақ бар. Мұнда ірі компаниялар мен қайта өңдеу секторлары жұмыс істейді. Бұл Алматы облысы мен Алматы қаласының дамуына зор үлес қосады, – деді.
Ал, 2017 жылы басталатын индустриалды кешен аумағына 4 шақырым жерге жылу жүйесі мен 17 шақырым жерге су тарту мәселесі бойынша жалпы сомасы 5,8 млрд. теңге қаражат қарастырылмақ.
Мақпал Мыса
Іле ауданы.
