Талдықорған қаласындағы Назарбаев зияткерлік мектебі облысымыздағы дарынды балаларға әлемдік деңгейде терең білім беріп, жастардың болашағына жарқын жол ашып отырған айтулы білім шаңырағы. Биыл аталмыш оқу ошағын 70 талантты жас бітірсе, олардың 26-сы еліміздегі ең беделді білім ордасы – Назарбаев университетіне, 13 түлек АҚШ, Венгрия, Германия, Корея, Болгария, Гонконг сынды шет мемлекеттердің айтулы жоғары оқу орындарына қабылданды.
Өзге оқушылар да жазғы уақытын тиімді өткізіп, қашықтан өткізілген түрлі білім, шығармашылық сайыстарына қатысып, дипломдар мен сертификаттар иеленді. Солардың бірі 10 «С» сынып оқушысы Назерке Рымбаева Республикалық «Дарын» байқауында «Абайдың ақын шәкіртерінің шығармалары» секциясы бойынша шығармашылық жұмыстарын ұсынып, жеңімпаз атанды.
– Қазір қашықтан білім алып жатқанымызға қарамастан онлайн режимде өтіп жатқан түрлі сайыстарға қатысудамыз. Бұл біз үшін үлкен мүмкіндік. Өз ізденісімізді ортаға сала отырып, қабілетімізді паш етеміз. Бұл бізді қанаттандырады. Биыл Абай атамыздың 175 жылдығы болғандықтан ақын шығармашылығына терең бойлағанды жөн көрдім. Әрбір сөзінен ғибрат іздедім. Оным нәтижесіз емес, – деп ағынан жарылды ол.
12-сынып оқушысы Әлім Тілеулиев қатысқан, Стэнфордта ұйымдастырылған екі апталық «Биомедициналық инженерия» онлайн курсы да сәтті өтті. Жас зерттеуші Қарағанды мен Қостанайдағы Назарбаев зияткерлік мектептері оқушыларынан құрылған команда негізінде «Өкпе обырын анықтаудағы жасанды интеллект» тақырыбында ғылыми мақала жазды.
– Біз медицина және биология инженериясын қолданып, түрлі қызықты тақырыпта зерттеу жүргіздік. Мәселен, медицинадағы жасанды интеллект, нанобиотехнология, биоимплант, тағы басқа. Курс соңында профессор, доктор Джаган өз блогында ғылыми мақаламызды жариялады. Осы еңбектің арқасында мен ғылыми жұмыстарды саралауды үйрендім. Бұл мен үшін қайталанбас құнды тәжірибе болды, – дейді Әлім.
Жаз айларындағы ең бір жарқын жетістік – шәкірттер Даниил Филимонов пен Виктор Кохноның роботталған стансы жобасы болды. Аталмыш жоба «Ғылым әлемін ашамыз» атты ғарыштық зерттеулер бойынша халықаралық жарыста ІІІ жүлделі орынға лайық деп танылды. Жас ізденушілер аппараттық режимде құрылыс жұмыстарын жасайтын мобильді роботтың прототипін ойлап тапқан. Аппарат жасанды интеллект жүйесімен және арнайы құралдармен жабдықталған.
– Біздің жұмысымыз Марста құрылыс жүргізгенде алғашқы болып пайдалануға негізделген. Егер мұны жүзеге асырса адамзат жұлдыздарға бір табан жақындай түседі, – дейді робототехниктер.
Міне, осындай дарынды шәкірттерді тәрбиелеп жатқан Назарбаев зияткерлік мектебі жаңа оқу жылында 900-ге жуық шәкіртке сапалы білім беріп, қиялдарына қанат бітіріп, ғылыми ізденістерге жол ашпақ.
Алма ТОПАНТАЙҚЫЗЫ
