Екінші дүниежүзілік соғыста етігімен қан кешкен ерлер аз емес. Сұрапыл соғысқа қатысып, Жеңіске қол жеткізген ардагерлер қатары бүгінде сиреп барады. Облыс бойынша қан майданды көрген 4 ардагер ғана қалыпты. Солардың бірі – Гаврил МОИСЕЕВ.
Майдангер 1922 жылы Ақсу ауданы Қапал ауылында дүниеге келген. 1929 жылы Қапал мектебінің табалдырығын аттап, 1939 жылы жетіжылдық мектепті аяқтайды. Кейін Қапал педагогикалық училищесіне оқуға түседі. Қанаты қатайып, буыны бекіген бозбала қару асынады деп кім ойлаған? 1941 жылы Екінші дүниежүзілік соғыс басталғанда ол Қызыл армия қатарына еніп, әскери мектепке оқуға жіберілді. Майдангер 1943 жылға дейін түрлі бөлімшелерде болып, ұрыс даласында өлшеусіз ерлік көрсетеді. Өкінішке қарай, майдангер 1943 жылы ауыр жарақат алып, Қызыл армия қатарынан босатылады.
Соғыстан келгеннен кейін ардагер ауылын өркендету үшін түрлі салада жұмыс істейді. Алғашқы жылы Қапал орта мектебінде сабақ берді. Кинотеатрда, ұжымшарда түрлі қызмет атқарады.
1945 жылы үйленіп, отбасын құрады. Жан жары М. Клименко екеуі 4 бала тәрбиелеп өсіреді. Майдангердің әйелі 2008 жылы 84 жасында дүниеден өтті. Қазіргі таңда майдангер Ақсу ауданы Қапал ауылында кіші ұлы және келінімен бірге тұрады.
«Ер жігіт елі үшін туады» деген бар. Қазақ даласынан аттанған азаматтың майданда көрсеткен ерен ерлігі ескерусіз қалған жоқ. Ол Отан соғысы орденін, «Германияны жеңгені үшін» және көптеген мерекелік медальді кеудесіне тақты.
Біз елі, жері үшін ұрыс даласында атой салған батырларымызды ұлықтап, есімдерін ұрпақ жадында жаңғырта беруіміз керек. Ерлік ешқашан ұмытылмайды. Ол адамзатқа бейбітшілік пен тыныштықты мәңгілік сақтау керектігін ескертіп тұрғандай.
Аяулым Сәбетжанқызы,
ЖУ-дің студенті
