Мемлекет басшысы Қасым-Жомарт Тоқаев еліміздің табысты жолмен қарқынды дамуы үшін, ең алдымен, сауатты, бәсекеге қабілетті, өз кәсібін жетік меңгерген менеджерлер қажет екенін үнемі айтып келеді. Қазіргі заманның тілімен айтқанда, менеджер – ұжым қызметкерлерін ұтымды ұйымдастыра білетін, білім мен біліктілікке қатаң талап қоя алатын, сонымен бірге, жұмыстың сапасы мен нәтижесін аз күнде көрсететін өз саласының көшбасшысы. Кеңестік кезеңде мұндай менеджерлер тәлімгерлік мектебі арқылы тәрбиеленіп отырды. Жоғары оқу орындарының жас, идеяшыл жастары алдыңғы буын ағалардан кәсіби кеңес алып, қаншалықты қиын болса да қасынан қалмай жүріп маманданатын. Бұл оң нәтиже беріп, мемлекеттің барлық саласында алға жылжу болды. Осындай үлкен мектептің қалыбында шыңдалып, қызметтің қазанында қайнаған білікті менеджер, білімді басшы Мақсат Бекетаев десек, артық айтпағанымыз.
Естіген де шығарсыз, бәлкім, білесіз де, Есік қаласында ерекше қарауды қажет ететін жандардың орталығы бар. Ерекше болғанда, жүйке жүйесі сыр берген сырқаттарды емдейтін мекеме. Әрине, бір естігенде, тіксінесіз, үрей де билейді. Бірақ тағдырдың айдауымен сонда жатқан жандарды кімдер емдейді? Басы-қасында жүрген, ыстық-суығына төзген қандай жанкешті адамдар? Осы жағын ойлағанда орталық қызметкерлеріне еріксіз бас иесіз.
Иә, «Аманат» Есік арнайы әлеуметтік қызмет көрсету орталығы» КММ ұжымы – тағдыр сынағына түскен, жүйке ауруына шалдыққан науқастардың қамқоршысы. Бір сөзбен айтқанда, олар – түрлі үйірмелер, емдеу әдістері арқылы науқастардың көңілін аулап, жалғызсыратпай жанынан табылып жүрген үлкен жүректі жандар. Мақсат Бекетаев – осындай мейірім мен күтімге мұқтаж жандарды қарайтын мекеменің басшысы. Өзінің адами асыл қасиетімен, кеңестік кезеңнен жинаған баға жетпес тәжірибесімен аз күнде сырқаттардың қамқоршы әкесіне айналып үлгерді.
Ол қай қызметте жүрсе де өзінің бастамашылдығымен, кәсіби әлеуетімен алдыңғы қатардан көрініп келеді. Еңбекшіқазақ ауданы әкімінің орынбасары лауазымында да өзінің адами болмысымен, қызметтегі шешімталдығымен, ұйымдастыру қабілетімен халықтың көңілінен шықты. Ауданның ауылшаруашылығы саласын өркендетуге үлкен үлес қосты. Облыс қана емес, республика көлемінде бау-бақша, жеміс-жидек, көкөніс өнімдерімен Еңбекшіқазақ ауданының атын шығаруға ерекше еңбек сіңірді. Аудандағы фермерлердің жаңа технологияларды меңгеруіне, сол арқылы өнім сапасынф көтеруге күш салған бастамалары еш кеткен жоқ. Отандық өндірісті дамытқан шаруашылық қызметкерлерінің шетелмен байланыс орнатып, тәжірибе алмасуына мүмкіндік туғызды. Тіпті, АҚШ, Израиль, Венгрия, Сербия, Италия елдерінің фермерлерімен тәжірибе алмасуға атсалысты. Ауылшаруашылығы ғылымы мен тәжірибені ұштастырып, экспортқа баса көңіл бөлген білікті мамандардың бірі болды.
Мақсат Тоқбергенұлының қажырлы еңбегі мемлекет тарапынан да елеусіз қалған жоқ. Аграрлық саладағы еңбегі үшін «Ауылшаруашылығының үздігі» төсбелгісімен марапатталды. Сонымен бірге, Қазақ ұлттық аграрлық университетінің Құрметті профессоры атанды.
Осы жылдың наурыз айынан бері Мақсат Бекетаев жоғарыда тілге тиек еткен орталықтың директоры қызметін абыроймен атқарып келеді. Санаулы ай өткенімен оның әрқайсысы бір жылға тең десек, қателеспеспіз. Өйткені, Мақсат Тоқбергенұлының жаңа қызметі әлемдік пандемияның өршуімен, соған байланысты жарияланған Төтенше жағдай режимімен тұспа-тұс келді. Карантин кезінде орталықтың жұмысын күшейтіп, науқастар арасында сақтықты қатаң қадағалау қажет болды. Осыған байланысты кәсібилікке деген талап та өзгеріп, қиын уақытта қызметкерлер бұрынғыдан да үлкен қарқынмен жұмыла жұмыс істеді.
Орталық директорының бастамасымен психиатриялық кемістігі бар науқастар ұсталатын мектеп-интернатқа өзгерістер енгізілді. Атап айтқанда, жеке және көпшілікпен отыратын бөлмелерге жайлы жағдай жасалды. Ағымдағы жөндеу жұмыстары жүргізілді. Кірген адамға сүреңсіз көрінетін бөлме заттары жаңасына ауыстырылды. Ескі теледидарлар жаңартылды. Зал көрнекіленіп, кірген адамға бірден жайлылық сыйлайтындай болды. Бұдан бөлек, орталықта жатқан науқастар демалатын аумақ та абаттандырылды. Әдемі гүлзарлар жасалып, көгалдандыру жұмысы жүргізілді. Гүлзар арасымен серуендеген адам табиғаттың сұлулығына тамсанып, алқызыл гүл аңқыған ауаны құшырлана жұтатындай мүмкіндік туды.
Баса айтатын мәселе – орталықта қызметкерлер мен науқастар арасында бірде-бір коронавирус инфекциясы тіркелген жоқ. Бұл жаңа басшының талап ете білетін ерен еңбегінің арқасында екені айтпаса да түсінікті. Емдеу мекемесінде санитарлық талап қатаң сақталды. Арақашықтық, жиі-жиі қолды сабынмен жуу, бетперде тағу нормалары қадағаланды. Әсіресе, емделушілер арасында аурудың тарап кетпеуіне баса назар аударылды. Бұл талап індеттің беті қайтып, карантин режимі жеңілдетілсе де, күшін жойған жоқ. Өйткені, бұл мекемеде сақтық аса қажет. Ұзын саны 320 қызметкері, 500-ден астам емделушісі бар үлкен орталық үшін бұл өте маңызды.
Ерғанат ОРАЛБАЕВ
Еңбекшіқазақ ауданы
