Талдықорған қаласы әкімінің тапсырмасына сай Жетісу облысының орталығындағы барлық смарт аялдамалары қайта қалпына келтіріле бастады.
Мамандардың мәліметінше, бүгінде Талдықорған қаласы бойынша жалпы 21 смарт аялдамасы бар. Аталған аялдамалар осыдан 5 бұрын ғана қолданысқа берілгенімен сапасыздықтың кесірінен құр қаңқаға айналған. Бұл жолы жаңаланған аялдамалар енді 5 жылға сенімгерлік басқаруға беріліп, күнделікті тазаланып, тәулік бойы бейнебақылау арқылы қадағаланбақ.
– «2018 жылы салынған бұл аялдамалардың көп өтпей сапасы расымен сын көтермейтін дәрежеге жетіп, халық арасында үлкен мәселеге айналған болатын. Енді, міне, оларды түгелдей жөндеу жұмыстары қолға алынып, ретке келтіріле бастады. Биыл жыл соңына дейін 12 аялдаманы қайта қалпына келтіру көзделсе, қалған 9 аялдаманы 2025 жылдың көктемінде дейін жан-жақты жабдықтап ел игілігіне беру жоспарланған», –дейді Талдықорған қаласы әкімінің орынбасары Қуаныш Сейтімбетов
Жауаптылардың сөзінше, Талдықорғандағы бұл смарт аялдамаларда жылытқыш батареялар, салқындатуға арналған құрылғылар және тегін Wi-Fi мен смартфондарды қуаттандырғыштар қарастырылған. Аялдамалар негізінен таңғы 06:30-да ашылып, түнгі 22:00-де автоматты түнде жабылады.
Айдын КӘЛІМХАН
