2011 жылы Талдықорғанның Тәуелсіздік көшесінде орналасқан 91/95 нөмірлі үйге тұрғын үй-коммуналдық қызмет көрсету бағдарламасы бойынша күрделі жөндеу жұмыстары жүргізілді. Оған дейін аталмыш шаңырақтың шатыры тесіліп, қабырғасы шытынап, күйреген күйде болған еді. Сөйтсек, көне үйге 34 жыл бойы жөндеу жұмыстары жүргізілмепті. Ал бүгінде үйдің келбеті сәнді. Осы арада «Арна-Н» пәтер иелері кооперативінің төрайымы Нәзигүл Рахымбекованың атын ерекше атап өтуге болады. Тұрғындар татулығын сақтап, тазалық үшін жанын салып жүрген жанның жұмысы да жемісті.
Тұрғындар тозығы жеткен үйден үрейленгендерін жасырмайды. Нәзигүл Рахымбекова бастаған үй жанашырлары жөндеу жұмыстарының керектігін жергілікті әкімдікке құлағдар еткен. Жанайқай ескеріліп, жалпы жөндеу жұмыстары басталған. Құрылысты бастамас бұрын қалалық әкімдік, тұрғын үй-коммуналдық шаруашылығы өкілдері мен құрылысшы мердігерлер тұрғындармен тілдесіп, жаңғырту бағдарламасының негізін түсіндірген. Күрделі жөндеу оңайға соқпады. Ол үшін «Арна-Н» кооперативімен айтарлықтай дайындық жұмыстары жүргізіліп, бірлесіп иелену және мүлікті басқаруға тіркелу қажет болды. Бағдарлама объектісін басқару мекемесі, бас мердігер және пәтер иелері арасында үшжақты келісім жүргізілді. Құрылыс жұмыстарының қабылдауы және орындалған жұмыстардың актісіне қол қою келісім өкілдерімен жүргізілген.
Күрделі жөндеу жұмыстарына мемлекет тарапынан қаржы қайтарымды негізде бөлініп, 7 жыл уақытқа есептеліп берілді. Жұмыс басталып, алғашқы күш шатыр жөндеуге жұмсалды. Үйдің шатырынан және жертөледен қоқыс шығарылды, пеш жабдығы және су ағатын жүйелер жөнделді. Күрделі жөндеуден барлық инженерлік жүйелер өтті. Сондай-ақ, толық қалпына келтіру жұмыстары, су, жылу жүргізу құбырлары, жылу беру энергиясын үнемдейтін жеке бөлмедегі есепке алу құрылғылары мен жылу беру тораптары орнатылды. Жаңа жарықтандыру шамдары қойылды, жертөледегі және кіреберістегі пластикалық терезелер толығымен ауыстырылды. Жүйелі жұмыс үйдің жағдайын толық жасап, сәнін кіргізіп, көрікті етті. Қуанышқа бөленген тұрғындар жергілікті әкімдікке шексіз алғыстарын жеткізіп, шаттыққа бөленген болатын. Міне, содан бері бес жыл артта қалды. Жаңартылған үйдің қазіргі келбеті көз қуантады. Таза аула, жаңа үй тұрғындардың татулығынан хабар беретіндей. Бастаған істі тастамай, соңына жеткізе білген Нәзигүл Рахымбекова нәтижелі істің жемісін көріп, қуанышқа бөленуде. Иә, бұл қайсар жанның жеңісі. Ол өз сөзінде:
– Қазіргі таңда біз тұратын үй қаладағы әдемі де таза үйлердің санатына енді. Бұл біз үшін үлкен қуаныш. Әрине, оның бәрі тұрғындар татулығы мен ауызбіршіліктің нәтижесі. Жаңа үй жанымызды қуанышқа бөлейді. Ауламызды жиі тазалаймыз. Онда балалар ойнайтын жаңа алаңқай салынған. Салық бойынша қарызымыз жоқ. Айлық тұтыну қаржысын жазатын арнайы кітапшам бар. Тұрғындар да тұрақты төлеуге әбден дағдыланған. «Талдықорған бақ қала» жобасы бойынша да жұмыстарымыз жемісті. Барлық тұрғын бір- ауыздан тазалықты қолдап, санитарлық жұмыстарға толық қатысады. Біздің үйдің бір ерекшелігі, тұрғын үй қоры бар. Қорға ақша салу да жүйелі түрде жүргізіліп келеді. Үй жағдайын бұдан да жоғары деңгейге жеткізу – менің мақсатым.
Қала күніне орай облыс орталығында қалыптасқан дәстүр бойынша жыл сайын байқаулар өтеді. Биыл да бұл үрдіс үзілмей жалғасын тапты. Байқау қорытындысы бойынша үлгілі аула құрып, көптің назарын бұрып, тазалық пен тиянақтылықты алға қойған Нәзигүл Рахымбекова «Үздік ПИК» болып танылды. Қала әкімінің қолынан арнайы Алғыс хат алып, мерейге бөленді. Бұл жақсылыққа жаны жақын жанның бірінші жеңісі емес. Осының бәрі зейнеткердің жас күнінен бергі адал еңбегінің нәтижесі. Жақсылыққа бастама болған жанның еңбегі қашанда елеулі.
Құралбек Сәбитов
