Тоғжан Совет 2004 жылы 16 сәуірде, Балпық би ауылында дүниеге келген. Қазіргі таңда Нұрмолда Алдабергенов атындағы орта мектептің 11-сынып оқушысы. Сонымен қатар, жас жеткіншектер қатарында бой көрсетіп жүрген үздік спортшылардың бірі. Қол күресінен балалар мен жасөспірімдер арасында өткен облыстық біріншіліктің бірнеше дүркін жүлдегері, республикалық байқаулардың жеңімпазы. Сондай-ақ, шет мемлекеттерде Көк туымызды желбіретіп жүрген батыр қыз. Тоғжан жуырда қол күрестен өткен облыс чемпионатында қарсылас шақ келтірмей, алтыннан алқа тақты. Осыған орай, мақсаты айқын жас талантты спортшымен сұхбаттасудың сәті түскен еді. Ендеше алтын қыздың әңгімесіне құлақ түрейік.
– Тоғжан, облыс біріншілігіндегі алтының құтты болсын! Қол күресіне қалай келдіңіз?
– Спортқа деген қызығушылығым мектеп табалдырығын аттаған сәттен басталды. Оқушы кезден-ақ, көптеген жарыстарға қатыса бастадым. Алғашында бірнеше спорт түрімен шұғылданып бағымды сынап жүрдім. Алайда, соның ішінде менің таңдауым осы қол күресі болды. Жарысқа барып, бағымды сынағаннан кейін, осы спорт түрімен айналысқым келетінін түсіндім. Бұл спорт түрі жаныма жақын болғандықтан, жетістіктерге жетіп жүрмін. Жалпы қол күрес ерекше спорт түрі. Бұл жерде қарсыласыңнан соққы алмайсың. Таза білектің күшіне жүгінесің.
– Түрлі сайыстарда қанжығаңызға жеңіс байлағаныңызды білеміз. Сол жарыстардың ішінде қай сайысы сізге қиынға соқты?
– Әр жарыстың өзіндік қиындығы бар. Сайысқа барарда өзімді физикалық тұрғыдан да, психологиялық тұрғыдан да дайындаймын. Соның арқасында өзіме сенімді болып, әрдайым жеңіспен оралатынмын. Дегенмен, ауылдық округтерден шығып, ірі қалаларға бара бастағанымда қобалжулар пайда бола бастады. Ең қиын әрі есте қаларлық жарысым Азия кубогы болды. Себебі, бірнеше мемлекеттің мықтылары сол сайыста бақ сынастық. Десе де, қарсылыстарымның мықтылығына қарамастан, өзімнің осал еместігімді көрсетіп, сол сайыста жүлделі орынға ие болдым.
– Спортшылардың бабын келістіретін де, бағын ашатын да бапкері. Өзіңіздің бапкеріңіз жайлы не айтар едіңіз?
– Осы спорт саласына келгендегі бірінші бапкерім Абдуали Тастанов. Ол кісіге алғысымды білдіремін. Сонымен қатар, жетістіктерге жеткізіп, әр жарысқа қалдырмай апаратын, бар білгенін үйретіп жүрген Артём Фоменько мен Алмас Мұхамедқалиев ағайыма рахметімді айтамын. Ол кісілер болмаса, бұл жетістіктерді бағындырмайтын едім.
– Болашақта қандай маман иесі атанғыңыз келеді?
– Болашақта фармацевт болғым келеді. Бұл мамандық менің жүрек қалауым. Ал, спортты болашақта хобби ретінде алып жүргім келеді. Биыл мектеп бітіремін. Алда үлкен сынақ ҰБТ келе жатыр. Сол сынақтан жоғары балл жинап, жақсы маман иесі атанып, еліме елеулі, халқыма қалаулы азматша болғым келеді.
– Алға қойған мақсатыңыз қандай?
– Менің алға қойған басты мақсатым,– алдағы сынақтан абыроймен өтіп, спорт саласында жаңа белестерді бағындыру. Сонымен қатар, ата-анамның маған артқан үмітін ақтау.
Тоғжан, сұхбат бергеніңізге көп рахмет. Алға қойған мақсаттарыңызға жетуіңізге тілектеспіз.
Әңгімелескен:
Аяла АРЫСТАНБЕК
