Президент Қасым-Жомарт Тоқаев Бахрейн Королі шейх Хамад бен Иса Әл Халифамен Таяу Шығыстағы ахуалға қатысты пікір алмасты, – деп хабарлайды 7-su.kz ақпарат порталы.
Кездесу барысында Мемлекет басшысы Қазақстанның қазіргі күрделі кезеңде Бахрейн халқына тілектес екенін жеткізді. Сондай-ақ Иранға қарсы соғыс қимылдарына қатыспаған Бахрейн мен өзге де мемлекеттердің азаматтық инфрақұрылымының зымыранмен атқылануына алаңдаушылық білдірді.
Қасым-Жомарт Тоқаев Қазақстан жағдайдың одан әрі ушығуына жол бермеуді қолдайтынын атап өтіп, қақтығысты диалог пен дипломатия арқылы бейбіт жолмен реттеу қажеттігін айтты.
Өз кезегінде Король Хамад бен Иса Әл Халифа Қазақстан Президентіне қолдау білдіргені үшін алғыс білдірді. Ол сауда-экономикалық және инвестициялық байланыстарды дамытуға ерекше мән беретінін атап өтіп, екіжақты ынтымақтастықты одан әрі жандандыруға дайын екенін растады.
Кездесу қорытындысында тараптар Қазақстан мен Бахрейн арасындағы достық қарым-қатынас пен серіктестікті нығайтуға ниетті екенін жеткізді. Сондай-ақ қасиетті Рамазан айында екі ел халқына бейбіт өмір, бақ-береке тіледі.
