Бұл туралы Ақорданың баспасөз қызметі мәлімдеді, – деп хабарлайды 7-su.kz ақпараттық порталы.
Мемлекет басшысының айтуынша, бірінші атом электр станциясын салу – ауқымды жұмыстың бастауы ғана. Ол Қазақстанға бәсекеге қабілетті әрі дербес атом индустриясын қалыптастыру қажеттігін атап өтті.
«Атом энергетикасын дамыту арқылы біз энергетикалық тұрғыдан ешкімге тәуелді болмаймыз. Қазір Атом энергиясы жөніндегі агенттік стратегиялық құжат дайындап жатыр. Онда энергия тапшылығы бар аймақтарда шағын модульді реакторлар орнату мәселесі қаралуы тиіс», – деді Президент.
Қасым-Жомарт Тоқаев жаһандық климаттық саммиттерге қатысты көзқарасын да бөлісті. Оның айтуынша, климат тақырыбы төңірегіндегі кейбір пікірталастардың астарында саяси және экономикалық мүдделер бар.
«Мен Дубай мен Бакуде өткен саммиттерге қатыстым. Әсерімді әріптестерге де, Үкімет мүшелеріне де айттым: бұл кең ауқымды алаяқтыққа ұқсайды. Бұл сөзімді Премьер-министр Олжас Бектенов растай алады. АҚШ Президенті Дональд Трамп та Біріккен Ұлттар Ұйымында сөз сөйлегенде «Климаттың өзгеруі – жаһандық алаяқтық» деп айтты. Сондықтан Қазақстан 35 жылдан кейін ғана көміртек көздерінен бас тартады деген ресми ұстанымымызды жарияладық», – деді ол.
Президент қазіргі энергия өндірісі мен болашақтағы қажеттілікке тоқталды. Оның айтуынша, Қазақстан жылына шамамен 118 миллиард киловатт энергия өндіреді, алайда бұл жеткіліксіз.
«Цифрландыру мен жасанды интеллектіні қарқынды дамытсақ, әлдеқайда көп энергия қажет болады. Сондықтан еліміз барлық энергетика көздерін тиімді пайдалануы тиіс. Ең алдымен, көмір. Қазақстан жылына 113 миллион тонна көмір өндіреді. Бұл көрсеткіш бойынша біз әлемдегі ең ірі он мемлекеттің қатарына кіреміз. Бұл – біздің актив, артықшылығымыз. Оны дұрыс пайдалануымыз керек», – деді Мемлекет басшысы.
Ол сонымен бірге баламалы энергетикаға қатысты ойын білдірді:
«АҚШ Президенті «Маған жел ұнамайды, маған көмір ұнайды» деп өте дұрыс айтты. Шын мәнінде, жел станциялары қымбат әрі табиғатқа зиян келтіруі мүмкін. Ал қазіргі озық технологиялар көмірді экологиялық тұрғыдан тазалап, зиянсыз етуге мүмкіндік береді. Оның бағасы да жел, күн, газға қарағанда әлдеқайда тиімді», – деді Қасым-Жомарт Тоқаев.
