Облыстық сауда және тұтынушылар құқықтарын қорғау департаментінің жауапты өкілдері шаһар тұрғындарының өтініштеріне құлақ түрді. Көтерген мәселелеріне байланысты кеңес беріп, түйткілді істердің шешілу жолдарын көрсетті.
Өңірде тұтынушылардың арыз-шағымы көбейген. Салаға жауапты мамандар бір күнде 6 адамның тілек-өтінішін тыңдап, керібайланысқа шықты. Онлайн өткен жиында кейбір өтініш берушінің сұраулары қанағаттандырылса, енді біріне сотқа жүгінуге, дәлел-дәйек жинауға кеңес берілді.
Облыстық сауда және тұтынушылар құқықтарын қорғау департаментінің басшысы Айдос Дауешев тұтынушыларға тұтынған заттарында қандай да бір көңіл толмас олқылық болса көп күн өткізбей саудагермен байланыс жасағаны дұрыс дейді. Түсініспеушілік болып жатқан жағдайда арыз-шағыммен аталған департаментке хабарласса болатынын айтады.
Өткен 8 айда облыс тұрғындарынан сауда және тұтынушылар құқықтарын қорғау департаментіне 500 өтініш түсіпті. Оның 205-і оңды шешіліп, жалпы сомасы 11 373 900 теңге тұтынушыларға қайтарылған. Өтініштердің саны 2022 жылмен салыстырғанда 5 есеге өскен. Сондай-ақ, 241 өтініш бойынша түсіндіру жұмыстары жүргізіліп, 45-і қайта бағытталып, 7-уі кері қайтарылыпты.
Департаментінің негізгі міндеті – ішкі сауданы дамыту және реттеу саласындағы мемлекеттік саясатты іске асыру, тұтынушылардың құқықтарын қорғау саласында біртұтас және тиімді саясатты қалыптастыру екенін айта кеткен жөн.
Статистика бойынша облыстық сауда және тұтынушылардың құқықтарын қорғау департаментіне түскен электрондық сауда саласына өтініштердің өсуі байқалады.
Былтыр электрондық сауда саласындағы өтініштердің саны 63-ті құраса оның 23-і оң шешімін тапты. Биылғы 8 айда 78 шағым түсіп, 39-ы оң шешілген.
Алмас МЫРЗАХМЕТОВ
Фото: gov.kz
