Қазақ руханияты тағы 14 кітаппен толықты. Облыс әкімі Амандық БАТАЛОВТЫҢ қолдауымен жарық көрген тың туындылардың тұсаукесер рәсімі Талдықорған қаласындағы Тіл сарайында өтті.
Рухани шара шымылдығын облыстық мәдениет, архивтер және құжаттама басқармасының басшысы Мәрлен Көлбаев құттықтау сөзімен ашты. Өз кезегінде игілікті жиынға арнайы келген ҚР Мәдениет және спорт вице-министрі Сәкен Мұсайбековті таныстырып өтті. Сонымен қатар, халық қалаулысы Сәкен Жүнісбекұлы, облысымыздың Құрметті азаматы Наурыз Қылышбаев, қоғам қайраткері Өмірәлі Жалайри аталмыш жинақтардың тұсаукесер рәсімін өткерді.
Тың туындылары жарық көрген авторлардың және өңіріміздегі зиялы қауымның қатысуымен өткен жиында алғашқы болып «Жаңаталап жастары» мемуарлық шығармасының авторы Наурыз Қылышбаев сөз алды. Өткенді танудың болашаққа деген аршынды қадам екенін, тарихымыз бен әдебиетіміздің тамырын көктету, өркениетімізді өркендету екенін атап өткен ол әдебиетке, ақын-жазушыларға қолдау білдірген облыс басшыларына деген алғысын білдіріп, тың туындылардың авторларына шығармалары оқырман олжасына айналсын деген ақжарма тілегін жеткізді.
Өз кезегінде сөз алған «Батыр балалар ізімен» кітабының авторы Өмірәлі Жалайри бабалар рухын аспандата сөйлеп, туындыға аз-кем шолу жасаса, «Қос құбылам» жинағының авторы Аршагүл Тойбаева туынды мазмұнын баяндап өтті. Сондай-ақ, рухани шарада сөз алған авторлар өз шығармашылығы мен ізденісінен туған тың туындылар тұрғысында ой тербеді. Айта кетелік, рухани шарада «Ертегілер әлемі» кітабының авторы Жұмабала Қарақанова, «Арша жұпары» кітабының авторы Серік Әбікенұлы, «Жүрегімнің хаттары» – «Жүрегіңнің хаттары» жинағының авторы Гүлбақыт Қасен, «Қаражұрт» – «Мінездегі мен» туындысының авторы Жұматай Оспанұлы сөз алып, руханият қоржынына қосылған шығармалар жайлы сөз қозғап, жарық көруге қолдау білдірген облыс басшысына, облыстық мәдениет, архивтер және құжаттама басқармасына деген алғысын жеткізді.
Шара соңында кітаптың сапасы, мұқабасының безендірілуі, ішкі мазмұнға сай көркемделуі сынды баспа жұмысы мен талабы тұрғысында белгілі журналист, баспагер Ырым Кененбай ой қозғап, авторларға ақсақалдық ақ батасын жаудырды. Өз кезегінде облыстық Сүйінбай атындағы филармонияның әншілері әннен шашу шашып, шара көрігін қыздырды.
Асыл СҰЛТАНҒАЗЫ
