Президенттің «Turkistan» газетіне берген «Қазақстан жаңғырудың жаңа кезеңіне қадам басты» атты сұхбатын оқып, мол мағлұматтан хабардар болдым. Басылым редакторы Бауыржан Бабажанұлы еліміздің қазіргі жағдайына, экономикалық-әлеуметтік дамуына, тарихына, Мемлекет басшысының жеке басына қатысты сұрақтарды суыртпақтап қойып, көпшілікті разы ететін пікірді паш ете біліпті. Бұл газет тілшісінің шеберлігін, тапқырлығын, кәсібилігін көрсетсе керек.
Ел ішінде жүрген әңгімелердің, қауесеттің негізсіздігін әрбір пікірімен дәлелдеген Қасым-Жомарт Тоқаевтың бойындағы отаншылдық, мемлекетшілдік рухының қаншалықты екенін байқатқан сұхбат жаңа жылдың пердесін түрген шақтың мән-маңызын арттыра түсті деп есептеймін. Себебі, келер күннің қандай боларын алға қойған меже-міндеттің маңыздылығынан байқау қиын емес. Еліміздің ақпараттық кеңістігіндегі ахуалды салмақтаумен басталған сұхбатта өткен жылдың нәтижесі, Жаңа Салық кодексінің берері мен тиімділігі, экономикалық реформалардың қажеттілігі, энергетикалық және коммуналдық саланы жаңғыртудың маңыздылығы, еліміздің көлік-логистика, ауыл шаруашылығы, туризм, баламалы қуат көзі секілді салаларында атқарылуы тиіс шаралардың кезек күттірмейтіндігі ойландырады.
Облыстық мәслихаттың тұрғын үй-коммуналдық шаруашылығы және құрылыс мәселелері жөніндегі тұрақты комиссиясының төрағасы ретінде айтарым, коммуналдық төлемдер бағасының өсуіне қатысты Президенттің: «Үкімет энергетикалық және коммуналдық нысандарды жаппай жаңғырту жұмыстарын қолға алды. Ұзындығы жүздеген шақырым болатын инженерлік желілер мен электр қуатын тарататын желілер салуымыз керек. Бүгінгі таңда осы ауқымды жобаның жобалық-сметалық құжаттамасы әзірленіп жатыр.
Қазірдің өзінде қауіпті «қызыл» аймақта тұрған жылу электр стансыларының саны 19-дан 10-ға дейін азайды. Қабылданған шаралардың нәтижесі көріне бастады. Нысандардың апаттық жағдайға тап болу қаупі сейіліп келеді.
Дегенмен, әбден тозып, әупіріммен әрең тұрған инфрақұрылымды қалпына келтіру жеткіліксіз, жұмыс тәсілін өзгерту керек. Сондықтан, жаңғырту шаралары ең басты міндетті шешуге тиіс, яғни, салаға инвестиция салу үшін қолайлы жағдай жасап, нағыз нарықтық тетіктер қалыптастыруы қажет» – деген сөзі соңғы жылдары елімізде қолға алынып жатқан экономикалық реформаның себебі мен мүмкіндігін ашып көрсетеді. Шынында коммуналдық қызметтерге артық төлем жасаудан арылып, электр қуаты мен жылуды үнемдеу қарапайым тұрғындар үшін өте қажетті қадам. Яғни шығын мен рәсуаның тиімсіздігін түсінетін уақыт жеткенін айтуға тиіспіз.
Міне, мемлекет үшін түйткілді мәселені ұғынықты тілмен талқылаған Қасым-Жомарт Кемелұлының айтар ойы – әрбір қадамның астарында халықтың игілігі тұру керек дегенге жетелейді. Отан отбасынан басталатынын ескерсек, үйдегі дұрыс тәлім-тәрбиені көріп өскен ұрпақ мемлекеттің керегесі кең қаланып, уығы дұрыс орнатылып, шаңырағы биік болғанын қалайды. Сондықтан бұл сұхбат жасөспірімдердің бойындағы отаншылдық сезімін оятады деп сенемін.
Қайрат КЕРЕЕВ
облыстық мәслихаттың депутаты
