Қазақстан Үкіметі жаңа салық-бюджеттік реформаның шағын және орта бизнеске қосымша жүктеме әкелетінін толық түсінеді. Бұл туралы Премьер-Министрдің орынбасары – Ұлттық экономика министрі Серік Жұманғарин мәлімдеді.
Бұл жөнінде 7-SU.KZ ақпараттық порталы хабарлайды.
Министрдің айтуынша, 2025 жыл елімізде жаңа салық-бюджеттік саясаттың қабылдануымен есте қалады.
Биылғы жыл жаңа салық-бюджеттік саясаттың қабылдануымен есте қалады, – деді Серік Жұманғарин.
Ол жаңа фискалдық саясаттың негізгі мақсаты аймақтар арасындағы теңсіздікті азайту және кәсіпкерлікті, әсіресе микро және шағын бизнесті қолдау екенін атап өтті.
Жаңа фискалдық саясатта бекітілген негізгі принциптер – аймақтық стандарттар жүйесі арқылы өңірлер арасындағы теңсіздікті азайту және кәсіпкерліктің, әсіресе микро және шағын бизнестің дамуы арасындағы алшақтықты төмендету, – деді министр.
Серік Жұманғариннің мәлімдеуінше, 2026 жылдан бастап жаңа фискалдық саясат бюджет кірістерін едәуір арттыруды көздейді.
2026 жылдан бастап фискалдық саясат бюджет кірістерін шамамен 4 триллион теңгеге арттыруды жоспарлап отыр, – деді ол.
Министр бұл қаражаттың экономиканы дамытуға және отандық бизнесті қолдауға бағытталатынын айтты.
Қосымша қаржылық ресурстар Президент пен Үкіметтің шешімдері негізінде экономиканы әртараптандыруға, кәсіпкерлікті қолдауға және өңірлердің дамуын теңестіруге жұмсалады, – деп түйіндеді Серік Жұманғарин.
