Жетісу облысында 2026 жылғы 8-10 қаңтар аралығында жол қозғалысы қауіпсіздігін арттыруға бағытталған «Жалған нөмірлер» жедел-профилактикалық іс-шарасы өтті, – деп хабарлайды 7-su.kz ақпараттық порталы.
Полиция қызметкерлері үш күн бойы жолдардағы тәртіпті қатаң қадағалап, жалған, оқылмайтын немесе талапқа сай емес мемлекеттік нөмір таққан жүргізушілерді анықтады. Рейд барысында тек нөмір белгілеріне ғана емес, жол қозғалысының өзге де өрескел бұзушылықтарына баса назар аударылды.
Іс-шара қорытындысы бойынша анықталған 900 құқық бұзушылықтың құрылымы төмендегідей:
-
Қауіпсіздік белдігі мен шлем: 431 жағдай (ең жиі кездесетін бұзушылық);
-
Ұялы телефон пайдалану: 255 жүргізуші рөлде отырып телефонмен сөйлескені үшін жауапқа тартылды;
-
Нөмір белгілеріне қатысты: 143 дерек (талапқа сай емес, оқылмайтын немесе орнынан тыс орнатылған нөмірлер);
-
Нөмірсіз немесе тіркеусіз көлік: 51 факт тіркелді.
Тексеру нәтижесінде 45 автокөлік арнайы айып тұрағына қойылды. Олардың ішінде екеуі шетелдік мемлекеттік тіркеу нөмірімен заңсыз жүрген көліктер. Полиция департаментінің өкілдері атап өткендей, жол ережесін сақтау бұл жай ғана формальдылық емес, әрбір азаматтың өмірі мен денсаулығының кепілі.
«Жолдағы тәртіп – жалпы қауіпсіздіктің негізі. Мұндай іс-шаралар жүргізушілерді жазалау үшін емес, жол мәдениетін қалыптастыру және қайғылы жағдайлардың алдын алу үшін өткізіледі», – деп мәлімдеді ведомство қызметкерлері.
Жүргізушілер мен жаяу жүргіншілерді сақ болуға шақырамыз. Есіңізде болсын, 2026 жылдың 1 қаңтарынан бастап айлық есептік көрсеткіштің (АЕК) өсуіне байланысты жол ережесін бұзғаны үшін айыппұл мөлшері де ұлғайған. Тәртіпке бағынған – құл болмайды!
