Көксу ауданы оқушыларының арасында «Жас ұлан – 2024» әскери-патриоттық ойыны өтті. Жалпы, ауданда әскери спорттық ойындар 1972 жылдан бері дәстүрлі түрде өтіп келеді.
«Айбын», «Алау», «Қайсар», «Сардар», «Жас ұлан» сияқты әскери-патриоттық ойындарынан облыстық, республикалық кезеңдерде аудан оқушылары неше дүркін чемпион атанып жүргенін ерекше атап өткеніміз жөн.
Өскелең ұрпақты отансүйгіштікке тәрбиелей отырып оқушылардың әскери-патриоттық шеберлігін көтеруге, жасөспірімдерді ҚР Қарулы Күштеріне сүйіспеншілікпен қарауға, туған елін қорғау мақсатында ұйымдастырылған байқау биыл Жамбыл ауылындағы Лабасы тауының етегінде өтті. Ауданымыздың 23 мектебінен 230 оқушы қатысты. 9 бағыт бойынша ұйымдастырылған әскери-патриоттық ойында оқушылар сапта жүру, әскери кедергілерден өту, автоматты шашып, қайта жинау, азаматтық қорғаныс, әскери қалашық, патриоттық ән, қарумен ату, кермеге тартылу сынды тапсырмаларды орындады.
Номинациялар қорытындысы бойынша толық жинақты және шағын жинақты мектептер арасында екі топта бағаланды. Байқау нәтижесінде толық жинақты мектептер арасында ерекше дайындықпен келген Н. Алдабергенов атындағы орта мектептің командасы бас жүлдені иеленді. І орынды Ж. Егінбаев және Қ. Жапсарбаев атындағы мектеп оқушылары қанжығалады. Медеубай Құрманов атындағы №2 орта мектеп ІІ орыннан көрінсе, Алғабас және З. Тамшыбай атындағы орта мектептер ІІІ орынды қанағат тұтты. Ал шағын жинақты мектептер арасында Бесқайнар орта мектебінің оқушылары үздіктер көшін бастады. І орын №12, ІІ орын Жамбыл атындағы орта мектепке, ал ІІІ орын С. Қырықбаева атындағы орта мектеп оқушыларына бұйырды.
Назира ТӘЛІПОВА,
білім бөлімінің
әдіскері
Көксу ауданы
