Аудан орталығында жыр алыбы Жамбыл жыраудың ескерткіші ашылды. Ұзынағаш ауылының кіреберісіне қойылған ақынның тастұғырдағы асқақ мүсіні ауданның атына заты сай екенін әйгілей түсіп, елді мекенге ерекше сән берді. Халық поэзиясының алып тұлғасына ескерткіш қою құрметіне ұйымдастырылған шараға облыс әкімі Амандық БАТАЛОВ қатысты.
Ескерткіштің ашылу салтанатында өңір басшысы:
– Қазақ халқының біртуар перзенті, халық поэзиясының әйгілі тұлғасы, өлең сөздің дүлдүлі, ұлы ақын, жыршы, жырау Жамбыл Жабаевтың ескерткішінің ашылуымен баршаңызды шын жүректен құттықтаймын! Біз қашанда ұлылардың рухын қастерлей білген, «Өткенсіз бүгін жоқ, тарихсыз болашақ жоқ» дейтін халықпыз. Сондықтан елдің тұтастығы, бірлігі жолында қызмет еткен бабаларымызға тағзым ету – бәріміздің азаматтық борышымыз.
Бұл орайда Елбасының «Рухани жаңғыру» бағдарламасы әлеуметтік-мәдени салалардың тың серпінмен дамуына ерекше ықпал етіп отыр. Елді мекендер көркейіп, әлеуметтік нысандар ашылуда, тарихи орындар түгенделіп, өлкетануға кең өріс ашылды. Әсіресе кәсіпкер азаматтар бағдарламаны жүзеге асыруға, туған жерін көркейтуге белсене атсалысып келеді. Бүгінгі шара соның айқын көрінісі. Меценаттардың экономиканың басқа салаларымен қатар мәдениетке қолдау көрсетуі руханияттың дамуына қызмет еткені деп түсінеміз.
Бұған дейін Астанада, Сербияның Белград қаласында, Украинаның астанасы Киевте, Еңбекшіқазақ ауданының Есік қаласында жыраудың ескерткіштері қойылды. Ақынның рухына жасалған құрмет бүгін Ұзынағаш ауылында жарасымды жалғасын тауып отыр, – деген облыс әкімі бұл ескерткіштің тәуелсіздіктің туындысы, елдіктің жемісі екенін атап өтті. Осындай игі істің атқарылуына мұрындық болған азаматтарға ризашылығын білдіріп, бүгінгідей шараның жас ұрпақты отаншылдыққа тәрбиелеудегі маңызы зор екенін баса айтты. Сөзінің соңында «Ғасыр жасаған Жамбыл атамыздың аруағы баршамызды желеп-жебеп жүрсін. Қашанда бірлігіміз жарасып, игі істеріміз мол болсын», – деді.
Жиында «Жақсылық» шаруа қожалығының төрағасы, облыстық мәслихат депутаты, Қазақстанның Еңбек Ері Жақсылық Үшкемпіров, ауданда құрылған «Туған жерге тағзым» қоғамдық қорының төрағасы, Алматы облысының Құрметті азаматы Әскербек Абаев ескерткіштің ашылуына орай жылы лебіздерін білдірді. Одан кейін өңір жетекшісі бастаған құрметті қонақтар ескерткішті ашу рәсімін жасады. Ақ жамылғы сыпырылған сәтте қолына қазақтың қасиетті қара домбырасын ұстаған Жамбыл жыраудың асыл бейнесі биіктен жарқ етіп, ақжаулықты әжелер шашу шашты. Соңынан аудандық «Сүйінбай сазы» фольклорлық-этнографиялық ансамблінің әншілері ән мен жырды әуелетті.
Биіктігі 10 метрлік ескерткіш қоғамдық қордың қаражатына салынған. «Ақындар мен батырлар елі» саябағында орнатылған оның жалпы құны 80 млн. теңгеден асады, аумағы 0,23 гектар. Мүсін авторы Қазбек Жарылғапов. Саябақты абаттандыру жұмыстарына облыстық бюджеттен 60 млн. 368 мың теңге бөлініпті. Салтанатқа жиналған көпшілік тарам жолдың тоғысқан тұсынан орын алған еңселі ескерткішті тамсана тамашалап тарқасты. «Рухани жаңғыру» бағдарламасы аясында бой көтерген жаңа нысан ауыл ажарына өзгеше көрік қосты.
Серік САТЫБАЛДИЕВ.
